اسرائیل کی جانب سے فلسطینیوں پر بمباری کا سلسلہ تھم نہ سکا، غزہ کے جنوبی علاقے رفح میں کیمپ پر فضائی حملے کے دوران 21 فلسطینی شہید ہوگئے۔
غیرملکی میڈیا رپورٹس کے مطابق اسرائیلی فورسز نے مغربی رفح کے علاقے المساوی میں بے گھر فلسیطنیوں کے کیمپ پر فضائی حملہ کیا۔
مزید پڑھیں
میڈیا رپورٹس کے مطابق اس سے قبل اسرائیلی فورسز نے فلسطینیوں کو اس علاقے میں منتقل ہونے کا کہا تھا کہ یہ محفوظ مقام ہے۔
غیرملکی میڈیا رپورٹس میں بتایا گیا ہے کہ اسرائیلی حملے میں شہید ہونے والوں کی میتوں اور زخمیوں کو انٹرنیشنل میڈیکل کور کے فیلڈ اسپتال لے جایا گیا ہے کیونکہ وہاں کوئی ہیلتھ سینٹر موجود نہیں۔
واضح رہے کہ اسرائیلی فوج نے 2 روز قبل بھی رفح میں بمباری کی تھی جس کے نتیجے میں 75 سے زیادہ فلسطینی شہید ہوگئے تھے۔
یہ بھی یاد رہے کہ 7 اکتوبر 2023 کو فلسطین کی مزاحمتی تنظیم حماس کے ایک آپریشن کے بعد سے اسرائیلی فوج اور حماس کے درمیان جنگ جاری ہے جس کے نتیجے میں 35 ہزار سے زیادہ فلسطینی شہید ہوچکے ہیں۔
