وفاقی وزیر داخلہ محسن نقوی نے دنیا بھر میں مقیم پاکستانیوں کو پاسپورٹ کے اجرا میں تاخیر کا نوٹس لتے ہوئے، ارجنٹ پاسپورٹ 7 روز میں جاری کرنے کا حکم دیا ہے۔ دیار غیر میں رہنے والے پاکستانیوں کو نارمل پاسپورٹ 30 روز میں جاری کیا جائے گا۔
وفاقی وزیرداخلہ محسن نقوی نے لندن میں پاسپورٹ اور نادرا سنٹرز کا دورہ کیا۔ وزیر داخلہ نے کہا کہ دیار غیر میں رہنے والے پاکستانیوں کے لیے اس پاسپورٹ پالیسی کا اطلاق دنیا بھر میں موجود تمام پاکستانی مشنز پر ہوگا، فی الوقت اوورسیز پاکستانیوں کو نارمل پاسپورٹ 4 ماہ جبکہ ارجنٹ پاسپورٹ ڈیڑھ ماہ میں مل رہا تھا۔
مزید پڑھیں
محسن نقوی نے کہا کہ پاسپورٹ میں تاخیر کسی صورت برداشت نہیں، مقررہ مدت کے اندر پاسپورٹ جاری نہ ہوا تو متعلقہ افسران کے خلاف ایکشن لیا جائے گا۔ وزیر داخلہ نے پاسپورٹ کی مقررہ مدت میں فراہمی یقینی بنانے کے لیے مانیٹرنگ سیل بھی قائم کر دیا ہے۔ جسے ان کی پی ایس او اے ایس پی شہر بانو ہیڈ کریں گی، اوورسیز پاکستانی مقرر مدت میں پاسپورٹ نہ ملنے پر رسید منسلک کرکے درج ذیل ای میل ایڈریس پر شکایت درج کرا سکیں گے۔
[email protected]
دورے کے موقع پر سینٹرز میں موجود اوورسیز پاکستانیوں نے نادرا کی کارکردگی کو سراہا اور کسی نے بھی نادرا کے حوالے سے شکایت نہیں کی۔ محسن نقوی نے پاسپورٹ اور نادرا کے عملے کی کمی کا نوٹس لیتے ہوئے عملے کی کمی پوری کرنے کے لیے مؤثر سٹاف مینجمنٹ کا حکم دیا ہے۔