پاکستان کو فٹبال ورلڈ کپ کوالیفائر میں سعودی عرب کے ہاتھوں شکست

فیفا فٹبال ورلڈ کپ 2026 کوالیفائر کے دوسرے راؤنڈ میں سعودی عرب نے پاکستان کو صفر کے مقابلے میں 3 گول سے شکست دے دی۔

جمعرات کو اسلام آباد کے جناح اسٹیڈیم میں کھیلے گئے میچ میں سعودی عرب نے آغاز سے ہی جارحانہ کھیل پیش کیا اور پاکستان پر تابڑ توڑ حملے کیے۔

سعودی عرب کی جانب سے پہلا گول 26 ویں منٹ میں کیا گیا جبکہ  دوسرا اور تیسرا گول بالترتیب 40ویں اور 58ویں منٹ میں کیا گیا۔

مہمان ٹیم کے فراس البریکان نے 2 اور مصاب الجوویر نے ایک گول کیا۔

پاکستانی کھلاڑی میچ کے دوران بے بسی کی تصویر بنے رہے اور گول کرنے سے قاصر رہے۔

واضح رہے کہ دونوں ٹیموں کے درمیان یہ فیفا ورلڈ کپ کوالیفائر کا دوسرا میچ تھا جبکہ سعودی ٹیم پہلی مرتبہ پاکستان آئی ہے۔

اس سے قبل نومبر 2023 میں سعودی شہر الاحسا میں کھیلے گئے پہلے میچ میں سعودی عرب نے پاکستان کو صفر کے مقابلے میں 4 گول سے ہرادیا تھا۔

فیفا کوالیفائر ٹورنامنٹ میں پاکستان کے ساتھ گروپ جی میں سعودی عرب، اردن اور تاجکستان ہیں۔

واضح رہے کہ پاکستانی ٹیم 5 میچوں میں مسلسل شکست کے باعث فیفا ورلڈ کپ 2026 کی دوڑ سے باہر ہو چکی ہے۔