سعودی وزیر داخلہ شہزادہ عبدالعزیز بن سعود کی سرپرستی میں مدینہ منورہ کے گورنر شہزادہ سلمان بن سلطان بن عبد العزیز نے عمومی پاسپورٹس کے ڈائریکٹوریٹ میں ’اسمارٹ روٹ‘ کا افتتاح کیا ہے۔
مزید پڑھیں
یہ اقدام وزارت حج وعمرہ، ڈیجیٹل گورنمنٹ اتھارٹی، اور سعودی ڈیٹا اینڈ آرٹیفیشل انٹیلی جنس اتھارٹی کے تعاون سے، مدینہ منورہ کے پرنس محمد بن عبدالعزیز انٹرنیشنل ایئرپورٹ پر کیا گیا، اس موقع پر ڈائریکٹر جنرل آف پاسپورٹس جنرل سلیمان بن عبد العزیز الیحییٰ بھی موجود تھے۔
اسمارٹ روٹ کے مقاصد
اس اقدام کا مقصد مسافروں کے سعودی عرب میں داخلے کے سفر کو جدید تکنیکی اور مصنوعی ذہانت کے استعمال سے آسان بنانا ہے، یہ نظام کیمروں کے ذریعے چہرے کی شناخت کرتا ہے اور پیشگی طور پر ان کے ڈیٹا کی تصدیق کے بعد، مسافر کو ’اسمارٹ روٹ‘ سے گزرنے کی اجازت دیتا ہے، جس سے ان کا سعودی عرب میں داخلہ سہل اور وقت کی بچت بھی ہوتی ہے۔
وزارت داخلہ میں ڈیجیٹل تبدیلی کی کوششیں
جنرل سلیمان بن عبد العزیز الیحییٰ نے تصدیق کی کہ وزارت داخلہ کی طرف سے اس اقدام کا افتتاح اس کی تمام سروسز میں ڈیجیٹل تبدیلی کو بڑھانے کی کوششوں کا حصہ ہے، جس کا مقصد شہریوں، مقیم افراد اور زائرین کو فراہم کی جانے والی سفری سروسز کو بہتر بنانا ہے۔
اس اقدام سے پاسپورٹس سروسز کے معیار میں بہتری آئے گی اور ڈیجیٹل تبدیلی کے ذریعے خدمات کی کارکردگی کو بڑھانے میں مدد ملے گی، جو مسافروں کے تجربے کو بہتر اور ان کے سفر کی کارروائیوں کو آسان بناتا ہے۔
