مکہ مکرمہ میں وفاقی وزیر مذہبی امور چوہدری سالک حسین نے سرکاری عازمین حج کی رہائش گاہوں اور ہسپتال کا دورہ کیا، اس دوران انہوں نے سرکاری عازمین سے ملاقات کی اور ان کی خیریت دریافت کی۔
وزیر مذہبی امور نے سرکاری انتظامات کی تعریف کی اور حکومتی اقدامات کو سراہا۔ عازمین حج نے بھی گزشتہ سالوں کی نسبت امسال کے انتظامات اور عملے کی کارکردگی کو مثالی قرار دیا۔
مزید پڑھیں
چوہدری سالک حسین نے بتایا کہ پاکستانی عازمین حج کو جمعرات اور جمعہ کی درمیانی شب کو منی لے جایا جائے گا۔ انہوں نے مزید کہا کہ منی اور عرفات میں مکتب کی سہولیات کیلئے پاکستان حج مشن مسلسل مصروف عمل ہے۔
وزیر مذہبی امور نے یہ بھی یقین دلایا کہ پاکستانی معاونین حج اور پیرامیڈیکل عملہ مشاعر میں بھی عازمین حج کے ساتھ رہے گا۔ عازمین حج کو قربانی سے متعلق اطلاع پاک حج ایپ کے ذریعے فراہم کی جائے گی۔
چوہدری سالک حسین نے مزید بتایا کہ وزارت میں قربانی کی رقم جمع کروانے والے عازمین کی قربانی 10 ذی الحجہ کی ظہر سے عصر کے درمیان مکمل کی جائے گی۔
انہوں نے عازمین حج سے درخواست کی کہ وہ امت مسلمہ، اپنے وطن پاکستان اور وزارت کو اپنی خصوصی دعاؤں میں یاد رکھیں۔