ایف آئی اے امیگریشن نے جناح انٹرنیشنل ایئرپورٹ پر کارروائی کرتے ہوئے جعلی سفری دستاویزات پر بیرون ملک جانے کی کوشش ناکام بنا دی، جعلی دستاویزات پر امریکا جانے کی کوشش کرنے والے مسافر کو آف لوڈ کردیا گیا۔
ترجمان ایف آئی اے کے مطابق ایف آئی اے امیگریشن نے ملزم محمد مقصود کو مشکوک جانتے ہوئے کارروائی کا آغاز کیا تو معلوم ہوا کہ ملزم کے پاسپورٹ پر جعلی ویزا لگا ہوا تھا، اور سیکیورٹی خصوصیات بھی مشکوک پائی گئی تھیں۔
مزید پڑھیں: ایف آئی اے کی کارروائی، آن لائن جنسی ہراسگی میں ملوث ملزم گرفتار
ایف آئی اے نے ملزم کو امیگریشن کلیئرنس کے دوران مشکوک پایا تو چھان بین کرنے پر ملزم کے خلاف کارروائی شروع کردی، اور ملزم کی جعلی دستاویزات پر فلائٹ نمبر جی ایف 753 کے ذریعے کراچی سے امریکا جانے کی کوشش ناکام بنا دی۔
تاہم، ملزم کی شناخت محمد مقصود کے نام سے ہوئی، اور ابتدائی تفتیش کے مطابق ملزم نے مذکورہ ویزا مہیش کمار اور نعیم احمد کی معاونت سے حاصل کیا۔
ملزم نے اپنے اور خاندان کے 5 ویزوں کے حصول کے لیے ایجنٹوں کو 60 لاکھ روپے ادا کیے، ملزم کو ایجنٹ کی نشاندہی اور مزید قانونی کارروائی کے لیے اینٹی ہیومن ٹریفکنگ سرکل کراچی منتقل کردیا گیا۔
