بلوچستان میں بارشوں کی تباہ کاریوں سے جاں بحق افراد کی تعداد 31 ہوگئی ہے، ایک لاکھ 9 ہزار 897 افراد متاثر ہوئے، 858 مکانات مکمل منہدم جبکہ 13 ہزار مکانات کو جزوی نقصان پہنچا۔
پروویشنل ڈیزاسٹرمینجمنٹ اتھارٹی(پی ڈی ایم اے) کے مطابق بلوچستان میں بارشوں کی تباہ کاریوں سے گزشتہ 24 گھنٹوں کے دوران مزید 2 افراد جاں بحق ہوئے ہیں، جس سے بلو چستان میں مون سون کی بارشوں کے دوران مختلف واقعات میں جاں بحق ہونے والے افراد کی تعداد 31 ہوگئی ہے۔
یہ بھی پڑھیں: سیلابی صورتحال، بلوچستان کے 10 اضلاع آفت زدہ قرار
رپورٹ کے مطابق جاں بحق ہو نے والوں میں 1خاتون اور 18بچے بھی شامل ہیں،موسلا دھار بارشوں کے دوران مختلف حادثات میں15 افراد زخمی بھی ہوئے، زخمیوں میں1خاتون اور 11بچے شامل ہیں۔
پی ڈی ایم اے کے مطابق بلوچستان میں یکم جولائی سے اب تک ایک لاکھ 9 ہزار 897 افراد متاثر ہوئے، طوفانی بارشوں سے 858مکانات مکمل منہدم جبکہ 13 ہزار 946 مکانات کو جزوی نقصان پہنچا، سیلابی صورتحال سے 58 ہزار 819 ایکڑ پر فصلیں اور66 کلومیٹر سڑکیں متاثرہوئیں۔
یہ بھی پڑھیں: کمراٹ: شدید بارش، بادل پھٹنے سے سیلابی صورتحال، سیاح محصور
طوفانی بارشوں کے باعث 7 پلوں کو نقصان پہنچا، صوبے میں بارشوں کے دوران 373مویشی ہلاک ہوئے، مو سلا دھار بارشوں کے دوران جعفر آباد کے 3 ، لورالائی اور کچھی کا 1،1 ہیلتھ یونٹ متاثرہوا۔
گزشتہ 24 گھنٹوں کے دوران زیارت میں 39 ملی میٹر، قلات میں 32 ملی میٹر اور خضدار میں 30 ملی میٹر بارش ریکارڈ کی گئی۔
