خیبرپختونخوا کابینہ نے وفاقی حکومت سے پختون امن جرگے میں پیش کردہ قرارداد کے مطابق وفاقی وزیر داخلہ کی سربراہی میں ایک کمیٹی تشکیل دینے کا مطالبہ کیا ہے۔
وزیراعلیٰ سیکرٹریٹ سے جاری ایک بیان کے مطابق، وزیراعلیٰ خیبرپختونخوا علی امین گنڈاپور کی زیرصدارت صوبائی کابینہ کا 16واں اجلاس منعقد ہوا جس میں پختون امن جرگے میں پیش کردہ قرارداد میں شامل مطالبات کے حوالے سے گفتگو کی گئی۔
یہ بھی پڑھیں: لکی مروت: امن عمل میں شامل ہوں ورنہ علاقہ چھوڑ دیں، قومی جرگہ عمائدین کا شرپسندوں کو پیغام
اس موقع پر صوبائی کابینہ نے وفاقی حکومت سے مطالبہ کیا کہ وفاقی وزیر داخلہ کی سربراہی میں کمیٹی تشکیل دی جائے جس میں وزیراعلیٰ خیبرپختونخوا سمیت صوبائی اسمبلی میں تمام پارٹیوں کے نمائندے شامل ہوں۔ صوبائی کابینہ نے مطالبہ کیا کہ وفاقی حکومت اس کمیٹی کی سفارشات کو سنے اور ان کے مطالبات پر پیشرفت کرے۔
اجلاس سے خطاب کرتے ہوئے وزیراعلیٰ علی امین گنڈاپور نے کہا کہ صوبائی حکومت اور سیاسی جماعتوں کی کوششوں سے جرگہ پر امن انداز میں ختم ہوا، جرگے نے اپنے مطالبات پر مشتمل قرارداد پیش کی ہے، اب ان پر پیشرفت کرنی ہے، جو مطالبات صوبائی حکومت سے متعلق ہیں انہیں صوبائی اسمبلی میں پیش کرکے اتفاق رائے پیدا کرنا ہے۔
یہ بھی پڑھیں: قومی جرگہ کی پیش کردہ تجاویز پر عمل درآمدیقینی بنایا جائے گا، وزیر اعلیٰ خیبرپختونخوا علی امین گنڈاپور
واضح رہے کہ 14 اکتوبر وزیر اعلیٰ خیبرپختونخواعلی امین گنڈاپور نے ایک بیان میں کہا تھا کہ جمرود میں منعقدہ قومی جرگہ کی جانب سے پیش کی گئی تجاویز پر عمل درآمد یقینی بنانے کی بھر پور کوشش کریں گے اور جو مطالبات صوبائی حکومت کے دائرہ کا ر میں نہیں انہیں متعلقہ وفاقی حُکام کے سامنے اٹھایا جائے گا۔
