سپریم کورٹ کے سینیئر ترین جج منصور علی شاہ عمرہ کی ادائیگی کے بعد وطن واپس پہنچ گئے ہیں۔
واضح رہے کہ سپریم کورٹ کے سینیئر ترین جج جسٹس منصور علی شاہ 24 اکتوبر بروز جمعرات عمرہ کی ادائیگی کے لیے سعودی عرب روانہ ہوئے تھے۔ میڈیا رپورٹس کے مطابق ان کے اہل خانہ بھی ان کے ہمراہ تھے۔ وہ بیرونِ ملک ہونے کی وجہ سے چیف جسٹس قاضی فائز عیسیٰ کے الوداعی ریفرنس میں بھی شریک نہیں ہو سکے تھے۔
یہاں یہ ذکر بھی ضروری ہے کہ گزشتہ روز سپریم کورٹ آف پاکستان کے چیف جسٹس جسٹس یحییٰ آفریدی نے سابق چیف جسٹس قاضی فائز عیسیٰ کی جانب سے شکیل کی گئی تنازعات کے حل کی متبادل کمیٹی تبدیل کردی تھی۔
مزید پڑھیں:جسٹس منصورعلی شاہ کی بطور چیف جسٹس تقرری کے نوٹیفکیشن کے لیے دائر درخواست پر عائد اعتراض ختم
سابق چیف جسٹس قاضی فائز عیسیٰ کی جانب سے اگست 2024 میں تنازعات کے متبادل حل کے لیے ٹاسک فورس کی ازسر نو تشکیل کی گئی تھی۔ 22 جولائی کو ایک نوٹیفکیشن جاری کیا گیا تھا جس کے مطابق سپریم کورٹ کے سینیئر جج جسٹس منصور علی شاہ کی ٹاسک فورس کی رکنیت ختم کردی گئی تھی اور جسٹس یحییٰ آفریدی کو کمیٹی کی سربراہی سونپی گئی تھی۔ کمیٹی کے دیگر ممبران میں جسٹس عائشہ ملک اور جسٹس شاہد وحید کو شامل کیا گیا تھا۔
جناب منصور علی شاہ صاحب عمرہ کی سعادت حاصل کر کے واپس پہنچ چکے ہیں۔ pic.twitter.com/TeZnChU6BM
— Faizan Durrani (@faizanasks) October 31, 2024
اب نو تعینات چیف جسٹس یحییٰ آفریدی نے کمیٹی کی تشکیل نو کرتے ہوئے سپریم کورٹ کے سینیئر جج جسٹس منصور علی شاہ کو اے ڈی آر کمیٹی کا چیئرمین مقرر کردیا ہے۔ نوٹیفکیشن میں کہا گیا ہے کہ جسٹس عائشہ ملک اور جسٹس شاہد وحید بدستور کمیٹی کے ممبران رہیں گے۔ سپریم کورٹ نے کی جانب سے نوٹیفکیشن کی کاپی تمام متعلقہ افسران کو بھجوا دی تھی۔
