معروف پاکستانی گلوکار عمیر جسوال نے اپنی دوسری شادی اور ثنا جاوید کو طلاق دینے سے متعلق پہلی بار لب کشائی کردی۔
عمیر جسوال نے سرکاری ٹی وی کے ایک پروگرام میں شرکت کی جہاں میزبان کی جانب سے انہیں مختلف سوالات پوچھے گئے جس کے انہوں نے جوابات دیے۔
یہ بھی پڑھیں ثنا جاوید کے سابق شوہر عمیر جسوال نئی دلہنیا بیاہ لائے
گلوکار نے ٹی وی میزبان کی جانب سے انہیں شادی کی مبارکباد دینے پر شکریہ ادا کرتے ہوئے کہاکہ اب میری زندگی خوبصورت گزر رہی ہے۔
عمیر جسوال نے کہاکہ جب تقدیر آپ کو درست مقام پر پہنچا دیتی ہے تو اس وقت آپ کو احساس ہوتا ہے کہ اللہ تعالیٰ کی جانب سے آپ کو ایک مخصوص سفر سے کیوں گزارا گیا، جس پر آپ اللہ کا شکر ادا کرتے ہیں۔
آپ کی دلہن کون ہیں اور ابھی تک آپ نے یہ سب چھپا کر کیوں رکھا ہوا ہے؟ اس سوال کے جواب میں انہوں نے کہاکہ پرفیشنل اور ذاتی زندگی کو الگ الگ رکھنا چاہیے۔
اپنی طلاق سے متعلق بات کرتے ہوئے انہوں نے کہاکہ میرے چاہنے والے بھی میرے لیے پریشان تھے اور مختلف پیغامات موصول ہورہے تھے، جس پر میں نے انہیں سمجھایا کہ اللہ کو ایسے ہی منظور تھا۔
عمیر جسوال نے کہاکہ جب میری شادی ہوئی تو ایک ہی تصویر سوشل میڈیا پر شیئر کرنے سے میرے چاہنے والے بہت خوش ہوئے، اس بات پر خوشی ہے کہ لوگ مجھ سے پیار کرتے ہیں اور نیک خواہشات کا اظہار کیا جاتا ہے۔
یہ بھی پڑھیں عمیر جسوال نے ثانیہ مرزا کو فون کال کیوں کی؟
واضح رہے کہ عمیر جسوال گزشتہ ماہ اکتوبر میں رشتہ ازدواج میں منسلک ہوئے تھے، اس سے قبل انہوں نے اداکارہ ثنا جاوید سے شادی کی تھی جو اب معروف پاکستانی کرکٹر شعیب ملک کی بیوی ہیں۔
