کوئٹہ سے تعلق رکھنے والے قومی بلائنڈ کرکٹ ٹیم کے کھلاڑی نعمت اللہ شاہوانی ورلڈ کپ جیتنے کے بعد کوئٹہ پہنچ گئے، اہل خانہ اور دوستوں نے ان کا شاندار استقبال کیا، نعمت اللہ بلائنڈ ٹی 20ورلڈ کپ میں شاندار کارکردگی پرپلیئر آف دی ٹورنامنٹ رہے۔
بلائنڈ ٹی 20ورلڈ کپ میں شاندار کارکردگی کا مظاہرہ کرنے کے بعد قومی بلائنڈ کرکٹ ٹیم کے کھلاڑی نعمت اللہ کوئٹہ پہنچ گئے۔ بس اسٹاپ پر نعمت اللہ کا والہانہ استقبال کیا گیا جس پرانہوں نے خوشی کا اظہار کیا۔
نعمت اللہ کے والد نے شکوہ کرتے ہوئے کہا کہ بیٹے نے تو پاکستان کا نام روشن کیا، تاہم کسی حکومتی شخصیت نے سرپرستی نہ ہی استقبال کے لیے آنے کی زحمت گوارا کی۔
نعمت اللہ کا کہنا تھا کہ اگر حکومت بلوچستان بینائی سے محروم کھلاڑیوں کے لیے کھیلوں کے میدان اور دیگر سہولیات فراہم کرے تومعاشرے میں موجود خصوصی افراد بھی بلوچستان سمیت پاکستان کا نام روشن کرسکتے ہیں۔
