وزیراعظم شہباز شریف نے بحرینی سرمایہ کاروں کو پاکستان میں سرمایہ کاری کی دعوت دیتے ہوئے کہا ہے کہ پاکستان اور بحرین کے درمیان برادرانہ تعلقات انتہائی مضبوط اور مشترکہ عقیدے، تاریخ اور ثقافت پر مبنی ہیں۔
بدھ کو اسلام آباد میں کونسل آف ریپریزنٹیٹوز کے اسپیکر احمد بن سلمان المسلم کی قیادت میں بحرین کے 11 رکنی پارلیمانی وفد سے گفتگو کرتے ہوئے وزیر اعظم شہباز شریف نے دونوں ممالک کے درمیان تجارتی حجم کو مزید بڑھانے کی ضرورت پر زور دیا۔
یہ بھی پڑھیں: انٹرنیشنل فنانس کارپوریشن پاکستان میں سالانہ کتنے ارب ڈالرز کی سرمایہ کاری کریگا؟
وزیر اعظم کا کہنا تھا کہ پاکستان اور بحرین کے درمیان برادرانہ تعلقات انتہائی مضبوط اور مشترکہ عقیدے، تاریخ اور ثقافت پر مبنی ہیں۔
وزیراعظم شہباز شریف نے دونوں ممالک کے درمیان پارلیمانی وفود کے تبادلوں کی اہمیت کو اجاگر کرتے ہوئے کہا کہ یہ باہمی تعاون کو بڑھانے کے لیے بہت ضروری ہے، بحرین میں پاکستانی مختلف شعبوں میں نمایاں خدمات سرانجام دے رہے ہیں۔
وزیراعظم کے مطابق غزہ کی صورتحال پر تبصرہ کرتے ہوئے شہباز شریف نے امت مسلمہ سے مطالبہ کیا کہ وہ غزہ اور فلسطین کے بھائیوں اور بہنوں کی مدد کے لیے اپنی کوششیں تیز کریں۔
