اسرائیل نے غزہ میں بمباری کرکے کم از کم 61 فلسطینیوں کو شہید کردیا ہے۔
الجزیرہ کے مطابق الوحدہ اسٹریٹ غزہ میں واقع ایک ریسٹورنٹ پر ہونے والے ایک اسرائیل ڈرون حملے میں 17 افراد شہید ہوگئے۔ یہ ریسٹورنٹ غزہ میں ان چند مقامات میں سے ایک تھا جہاں 2 ماہ سے زائد عرصے سے محصور غزہ کے عوام کے لیے اشیائے خورونوش دستیاب تھیں۔
یہ بھی پڑھیے: اسرائیل کا یمنی دارالحکومت صنعا کے مرکزی ایئرپورٹ پر حملہ
علاوہ ازیں، غزہ سٹی میں واقع الکرامہ نامی اسکول پر ہونے والی بمباری میں 13 افراد شہید ہوئے ہیں۔ اس کے علاوہ غزہ میں متعدد مقامات پر حملے کیے گئے جن سے درجنوں کی تعداد میں ہلاکتیں ہوئیں۔
واضح رہے کہ اسرائیل نے غزہ میں جنگ بندی کو یکطرفہ طور پر ختم کرکے 2 مارچ سے علاقے میں انسانی امداد کی ترسیل پر پابندی عائد کردی ہے جس سے فلسطینیوں کو خوراک، پانی اور ادویات کی شدید کمی کا سامنا ہے۔
یہ بھی پڑھیے: اسرائیل کا ایران اور حوثیوں کے خلاف کارروائی کا عندیہ، ایران کی جوابی وار کی دھمکی
ورلڈ سینٹرل کچن چیریٹی نے کہا ہے کہ اسرائیل کی طرف سے امدادی سامان کی روک تھام کے بعد انہوں نے غزہ میں اپنا کام روک دیا ہے جبکہ اقوام متحدہ سمیت دوسرے فلاحی اداروں نے اسرائیل سے غزہ کا محاصرہ ختم کرنے اور امدادی اشیا کے علاقے میں داخلے پر پابندی اٹھانے کی اپیل کی ہے۔
