نائب وزیراعظم و وزیر خارجہ اسحاق ڈار 19 سے 21 مئی تک چین کا سرکاری دورہ کریں گے۔
ترجمان دفتر خارجہ کے مطابق اسحاق ڈاریہ دورہ عوامی جمہوریہ چین کے وزیر خارجہ وانگ یی کی دعوت پر کررہے ہیں۔
ترجمان نے بتایا کہ دورے کے دوران دونوں وزرائے خارجہ جنوبی ایشیا کی بدلتی ہوئی علاقائی صورتحال اور امن و استحکام پر اس کے مضمرات پر تفصیلی بات چیت کریں گے۔
ترجمان کے مطابق دونوں فریقین پاک چین دوطرفہ تعلقات کے تمام پہلوؤں کا بھی جائزہ لیں گے، اور باہمی دلچسپی کی علاقائی اور عالمی پیشرفت پر تبادلہ خیال کریں گے۔
ترجمان کے مطابق یہ دورہ پاکستان اور چین کے درمیان جاری اعلیٰ سطحی تبادلوں کا حصہ ہے، یہ آل ویدر اسٹریٹجک کوآپریٹو پارٹنرشپ کو مزید مضبوط بنانے کے لیے دونوں ممالک کے مشترکہ عزم کی بھی نشاندہی کرتا ہے۔
دوسری جانب میڈیا رپورٹس کے مطابق اس دوران افغان وزیر خارجہ مولانا امیر خان متقی بھی چین کا دورہ کریں گے، جس سے پاکستان، افغانستان اور چین کے مابین سہ فریقی مذاکرات کا امکان بھی پیدا ہو رہا ہے۔
