نمیبیا کے دور افتادہ شمال مغرب میں ایک لگژری ٹینٹڈ لاج میں ایک شیر کے حملے کے بعد 59 سالہ سیاح اپنی جان سے ہاتھ دھو بیٹھا۔
پولیس حکام کے بیانات کے مطابق یہ واقعہ صبح کے اوائل میں اس وقت پیش آیا جب متاثرہ شخص دوسرے سیاحوں کے ایک گروپ کے ساتھ کیمپنگ کر رہا تھا۔
یہ بھی پڑھیں:’اونی چوہوں کے بعد سائنسدان ’اونی ہاتھی‘ کی پیدائش کے لیے کوشاں
نمیبیا کی وزارت ماحولیات کے ترجمان کے مطابق یہ شخص بیت الخلا استعمال کرنے کے لیے اپنے خیمے سے باہر نکلا ہی تھا کہ شیر نے اس پر جان لیوا حملہ کر دیا۔
ترجمان کے مطابق سیاح کے خیمے سے باہر نکلتے ہی شیر اس پر جھپٹ پڑا، اور جب تک دوسرے کیمپ والے شیر کو بھگانے میں کامیاب ہوئے تب تک سیاح مر چکا تھا۔
نمیبیا پولیس کے ترجمان ایلیفاس کوونگا نے بتایا کہ افسران جائے وقوعہ پر پہنچ گئے ہیں اور انہوں نے واقعے کے حوالے سے مکمل رپورٹ مرتب کرنا شروع کر دی ہے۔
یہ سانحہ ایک ایسے علاقے میں پیش آیا جو صحرائی شیروں کی آبادی کے لیے جانا جاتا ہے، جو نمیبیا کے شمال مغرب کے خشک اور پہاڑی مناظر میں گھومتے ہیں۔
یہ شیر سخت صحرائی حالات میں اپنی بقا کے لیے مشہور ہیں، جن کی تعداد 2023 میں 60 بالغ اور ایک درجن سے زیادہ بچوں پر مشتمل تھی۔
تاہم حالیہ مہینوں میں ان کی تعداد میں کمی دیکھی گئی ہے، جس کی وجہ خشک سالی کے بعد شکار کی دستیابی میں تیزی سے کمی کے ساتھ ساتھ جنگلی حیات اور انسانی برادریوں کے درمیان بڑھتے ہوئے تنازعات ہیں۔
