پاک فوج کے شعبہ تعلقات عامہ (آئی ایس پی آر) کے مطابق بلوچستان میں 2 مختلف انٹیلی جنس بیسڈ آپریشنز کے دوران بھارت کی پشت پناہی میں کام کرنے والی دہشتگرد تنظیم ’فتنہ الہندوستان‘ کے 7 دہشتگردوں کو ہلاک کردیا گیا۔
پہلا آپریشن ضلع کچھی کے علاقے مچھ میں دہشتگردوں کی موجودگی کی اطلاع پر کیا گیا، جہاں سیکیورٹی فورسز نے ٹھوس معلومات کی بنیاد پر کارروائی کرتے ہوئے دہشتگردوں کے ٹھکانے کو مؤثر طریقے سے نشانہ بنایا۔ شدید فائرنگ کے تبادلے کے بعد ’فتنہ الہندوستان‘ کے 5 دہشتگرد ہلاک کر دیے گئے۔
مزید پڑھیں: بلوچستان کبھی پاکستان سے علیحدہ نہیں ہو سکتا، یہ ہماری معیشت اور ثقافت کا حصہ ہے، ڈی جی آئی ایس پی آر
دوسرا آپریشن ضلع قلات کے علاقے مرگند میں کیا گیا، جہاں دہشتگرد تنظیم کے ایک اور ٹھکانے کو نشانہ بنایا گیا۔ کارروائی میں مزید 2 دہشتگرد مارے گئے۔
کارروائیوں کے دوران دہشتگردوں کے قبضے سے بھاری مقدار میں اسلحہ، گولہ بارود اور دھماکہ خیز مواد بھی برآمد ہوا۔ آئی ایس پی آر کے مطابق ہلاک دہشتگرد متعدد تخریبی کارروائیوں میں ملوث رہے تھے۔
بیان میں مزید کہا گیا ہے کہ پاکستانی سیکیورٹی فورسز بھارت کی سرپرستی میں ہونے والی دہشتگردی کے مکمل خاتمے کے لیے پرعزم ہیں اور قوم کے اس عہد کو دہراتی ہیں کہ ایسے عناصر اور ان کے سہولت کاروں کو ہر صورت کیفر کردار تک پہنچایا جائے گا۔
وزیراعظم کا مچھ اور مورگند میں دہشتگردوں کے خلاف کامیاب آپریشن پر سیکیورٹی فورسز کو خراج تحسین
وزیراعظم محمد شہباز شریف نے بلوچستان کے علاقوں مچھ اور مورگند میں سیکیورٹی فورسز کی جانب سے فتنہ الہندوستان سے تعلق رکھنے والے 7 دہشتگردوں کو ہلاک کرنے کے کامیاب آپریشن پر افواجِ پاکستان کو خراج تحسین پیش کیا ہے۔
مزید پڑھیں: حملہ آوروں کے لیے ہمارا جواب بے رحمانہ ہوگا، ڈی جی آئی ایس پی آر کا اسکائی نیوز کو انٹرویو
وزیراعظم نے ان کارروائیوں میں شریک افسران اور اہلکاروں کی پیشہ ورانہ مہارت، جذبے اور مؤثر حکمت عملی کو سراہتے ہوئے کہا کہ ملک سے دہشتگردی کی لعنت کے مکمل خاتمے تک اس کے خلاف جنگ جاری رکھی جائے گی۔
وزیراعظم نے اس عزم کا اعادہ کیا کہ بھارتی سرپرستی میں بلوچستان میں بدامنی پھیلانے والے عناصر اور ان کے ناپاک عزائم کو ہر صورت ناکام بنایا جائے گا۔ انہوں نے کہا کہ پوری قوم افواجِ پاکستان کے ساتھ کندھے سے کندھا ملا کر کھڑی ہے اور دہشتگردی کے خلاف اس جنگ میں ایک صف میں ہے۔
صدر مملکت کا سیکیورٹی فورسز کو خراجِ تحسین، فتنہ الہندوستان کے خلاف کارروائیوں کو سراہا
صدرِ مملکت آصف علی زرداری نے بلوچستان میں فتنہ الہندوستان کے خلاف 2 علیحدہ انٹیلیجنس بیسڈ آپریشنز کے دوران 7 دہشت گردوں کو ہلاک کرنے پر سیکیورٹی فورسز کو زبردست خراج تحسین پیش کیا ہے۔
مزید پڑھیں: پی ٹی آئی نے جوڈیشل کمیشن بنانے سے متعلق آئی ایس پی آر کا مطالبہ تسلیم کرلیا
ایوانِ صدر سے جاری بیان کے مطابق، صدر مملکت نے ان کارروائیوں میں بھارتی پشت پناہی سے چلنے والی تنظیم کے دہشت گردوں کی ہلاکت کو سیکیورٹی اداروں کی پیشہ ورانہ مہارت اور بہادری کا مظہر قرار دیا۔ صدر زرداری نے کہا کہ بھارت اپنی پراکسی تنظیموں کے ذریعے پاکستان میں دہشتگردی کو ہوا دے رہا ہے، تاہم قوم اور سیکیورٹی فورسز اس ناپاک سازش کو ناکام بنانے کے لیے پرعزم ہیں۔
ان کا کہنا تھا کہ دہشتگرد عناصر کے مکمل خاتمے تک آپریشنز جاری رہیں گے، اور پاکستان کی مسلح افواج فتنہ الہندوستان جیسے دشمن عناصر کو ختم کرنے کے لیے بھرپور اقدامات کر رہی ہیں۔ صدر مملکت نے زور دیا کہ ملک کے دفاع اور دہشتگردی کے مکمل خاتمے کے لیے ہمارا قومی عزم غیر متزلزل ہے، اور پوری قوم افواج پاکستان کے شانہ بشانہ کھڑی ہے۔
