وزیراعظم پاکستان شہباز شریف سے پاکستان کے ابھرتے ہوئے ڈیجیٹل کونٹینٹ کریئیٹر طلحہ احمد نے ملاقات کی۔ ملاقات وزیراعظم آفس میں ہوئی جس میں شہباز شریف نے طلحہ احمد کی تخلیقی صلاحیتوں اور ڈیجیٹل پلیٹ فارمز پر کامیابی کی تعریف کی۔
وزیراعظم آفس سے جاری کردہ اعلامیے کے مطابق شہباز شریف نے طلحہ احمد کی ڈیجیٹل دنیا میں نمایاں کامیابی کو سراہتے ہوئے انہیں اعزازی شیلڈ پیش کی۔ اس کے ساتھ ساتھ وزیراعظم نے انہیں ذاتی طور پر ایک الیکٹرانک ٹیبلیٹ بھی تحفے میں دیا۔
یہ بھی پڑھیں: ’آج دھوپ نکلا ہوا ہے، میرا دادا کاٹ رہا ہے لکڑی۔‘ گلگت بلتستان کے ننھے شیراز کا معصوم انداز میں وی لاگ،ویڈیو وائرل
اس موقع پر وزیراعظم کا کہنا تھا کہ پاکستان کے نوجوان حتیٰ کہ بچے بھی آج کے جدید دور میں اپنی صلاحیتوں کا لوہا منوا رہے ہیں، اور طلحہ احمد اس حقیقت کی روشن مثال ہیں۔ انہوں نے کہا کہ طلحہ احمد جیسے باصلاحیت نوجوان پاکستانی قوم کی لامحدود استعداد کی علامت ہیں۔
وزیراعظم محمد شہباز شریف سے کونٹینٹ کریئیٹر طلحہ احمد کی ملاقات
وزیراعظم کی طلحہ احمد کی ڈیجیٹل پلیٹ فارم پر کونٹینٹ کی تعریف اور اعزازی شیلڈ دی
وزیراعظم نے طلحہ احمد کو ذاتی طور پر لیپ ٹاپ بھی دیا.
طلحہ احمد کا وزیراعظم پاکستان کی جانب سے پذیرائی اور حوصلہ افزائی پر ان سے… pic.twitter.com/CKokFDgcU9
— Government of Pakistan (@GovtofPakistan) July 19, 2025
طلحہ احمد نے وزیراعظم پاکستان کی جانب سے ملنے والی پذیرائی اور حوصلہ افزائی پر ان کا شکریہ ادا کیا اور اس اعتماد کو اپنے لیے باعثِ فخر قرار دیا۔
واضح رہے کہ طلحہ احمد پاکستان کے مقبول ترین کم عمر ڈیجیٹل کونٹینٹ کریئیٹرز میں سے ایک ہیں جنہوں نے کم عمری میں ہی یوٹیوب، انسٹاگرام اور دیگر سوشل میڈیا پلیٹ فارمز پر اپنی معیاری اور مثبت ویڈیوز کے ذریعے لاکھوں دل جیت لیے۔
ان کا اندازِ گفتگو، سچائی پر مبنی پیغامات، اور بچوں و نوجوانوں کے لیے اصلاحی مواد انہیں دیگر کریئیٹرز سے ممتاز کرتا ہے۔ طلحہ احمد کا مواد صرف تفریحی نہیں بلکہ معلوماتی اور اخلاقی پہلو بھی لیے ہوتا ہے، جو والدین اور اساتذہ کی جانب سے سراہا جا رہا ہے۔
یہ بھی پڑھیں: ننھا وی لاگر رمضان ٹرانسمیشن کا حصہ: ’ اب شیراز کی قابلیت کو بیچا جائے گا‘ صارفین کی تنقید
طلحہ احمد کی وزیراعظم سے ملاقات نہ صرف ان کے کام کا اعتراف ہے بلکہ یہ نوجوان ڈیجیٹل ٹیلنٹ کے لیے ایک مثبت پیغام بھی ہے کہ پاکستان میں تخلیقی صلاحیتوں کو سرکاری سطح پر سراہا جا رہا ہے۔
