کیلیفورنیا کی سینیٹ نے پاکستان کے 79ویں یوم آزادی کے موقع پر متفقہ طور پر ایک قرارداد منظور کی، جس میں پاکستانی نژاد امریکی برادری کے کردار کو سراہا گیا اور پاکستان، امریکا تعلقات کو مزید مضبوط بنانے کے عزم کا اظہار کیا گیا۔
یہ بھی پڑھیں:امریکا پاکستان تجارتی ڈیل! پاکستان کو کیا فائدہ ہو سکتا ہے؟
یہ قرارداد سینیٹر ملیسا ہورٹاڈو نے پیش کی، جو کیلیفورنیا سینیٹ کی کم عمر ترین خاتون رکن ہیں۔ وہ روایتی پاکستانی لباس اور مہندی لگا کر سینیٹ میں آئیں۔
سینیٹر ہورٹاڈو نے کہا کہ پاکستانی امریکی برادری کی قربانیوں اور خدمات کو خراج تحسین پیش کیا جاتا ہے۔
انہوں نے کہا کہ پاکستان اور امریکا کے تعلقات جمہوریت، انسانی وقار اور استقامت جیسے مشترکہ اقدار پر قائم ہیں۔
اس موقع پر امریکا میں پاکستان کے سفیر رضوان سعید شیخ بھی موجود تھے۔ انہوں نے قرارداد پر شکریہ ادا کرتے ہوئے کہا کہ یہ اقدام دونوں ملکوں کے عوام کے مضبوط تعلقات کی عکاسی کرتا ہے۔
کیلیفورنیا میں بڑی تعداد میں پاکستانی نژاد امریکی رہائش پذیر ہیں، جو ریاست کی معیشت اور ثقافت میں نمایاں کردار ادا کر رہے ہیں۔
