پاکستان کے معروف کوہ پیما سرباز خان اور عابد بیگ نے بھی سلسلہ کوہ ہندو کش کی سب سے بلند چوٹی تریچ میر کو سر کرنے کا اعزاز حاصل کرلیا ہے۔
تریچ میر سطحِ سمندر سے 7 ہزار 708 میٹر بلند ہے اور یہ کوہ ہندو کش کی بلند ترین چوٹی ہے۔ اسے سب سے پہلے ناروے کے کوہ پیماؤں کی ایک ٹیم نے 1950 میں سر کیا تھا۔ اس لحاظ سے رواں برس اس کارنامے کی پلاٹینیم جوبلی منائی جارہی ہے۔
خیبرپختونخوا کلچر اینڈ ٹوارزم اتھارٹی کی جانب سے اس موقع پر مختلف تقریبات اور سرگرمیوں کا اہتمام کیا گیا، جن میں مقامی کوہ پیماؤں کے ذریعے تریچ میر سر کرنے کی مہم بھی شامل تھی۔
اسی مقصد کے لیے 6 رکنی ٹیم سرباز خان کی قیادت میں تریچ میر پر روانہ ہوئی۔ گزشتہ روز مشکل ترین موسمی حالات اور تیز ہواؤں کے باوجود سرباز خان اور ان کے ساتھی عابد بیگ چوٹی کی بلندی تک پہنچنے میں کامیاب ہوگئے۔
ٹیم کے دیگر چار کوہ پیما 7 ہزار 300 میٹر کی بلندی تک پہنچے اور مہم کو کامیابی کے ساتھ مکمل کیا۔
مزید جانیے کریم اللہ کی اس ویڈیو رپورٹ میں
