سیکیورٹی فورسز نے صوبہ خیبرپختونخوا کے مختلف علاقوں میں فتنۃ الخوارج کے خلاف انٹیلی جنس بیسڈ آپریشن میں 34دہشتگردوں کو ہلاک کردیا۔
آئی ایس پی آر کی طرف سے جاری کردہ اعلامیہ کے مطابق 13 تا 15 اکتوبر 2025 کے دوران خیبر پختونخوا میں متعدد جھڑپوں میں بھارتی سرپرستی یافتہ گروپ ’فتنہ الخوارج‘ سے تعلق رکھنے والے 34 خوارج ہلاک ہوئے۔
یہ بھی پڑھیے اورکزئی میں سیکیورٹی فورسز کا آپریشن، بھارتی سرپرستی میں سرگرم 30 دہشتگردوں کا خاتمہ
رپورٹ کے مطابق شمالی وزیرستان کے علاقے اسپن وام میں خوارج کی موجودگی کی اطلاع پر سیکیورٹی فورسز نے انٹیلی جنس بنیادوں پر آپریشن کیا۔ آپریشن کے دوران دستے نے خوارج کے ٹھکانوں کو موثر انداز میں نشانہ بنایا اور شدید فائرنگ کے تبادلے میں 18خوارج ہلاک ہوئے۔
جنوبی وزیرستان میں ایک اور انٹیلی جنس بنیاد آپریشن کے نتیجے میں 8 خوارج سے ملک و قوم کی جان چھڑا دی گئی۔
تیسرا تصادم بنوں ضلع میں پیش آیا جہاں سیکیورٹی فورسز نے مزید 8 خوارج کو کامیابی سے ہلاک کردیا۔
یہ بھی پڑھیے لکی مروت: سیکیورٹی فورسز کی کارروائی میں بھارتی حمایت یافتہ 17 خوارج ہلاک
ان علاقوں میں موجود کسی بھی دیگر بھارتی سرپرست خوارج کے خاتمے کے لیے صفائی (سینیٹائزیشن) آپریشن جاری ہیں۔
آئی ایس پی آر نے کہا ہے کہ وفاقی ایپیکس کمیٹی برائے نیشنل ایکشن پلان کے تحت منظوری شدہ وژن ’عزمِ استحکام‘کے تحت سیکیورٹی فورسز اور قانون نافذ کرنے والے ادارے غیرملکی سرپرستانہ اور مدد یافتہ دہشتگردی کا خاتمہ پوری طاقت کے ساتھ جاری رکھیں گے۔
صدر اور وزیراعظم کا سیکیورٹی فورسز کو خراجِ تحسین
صدر مملکت آصف علی زرداری اور وزیراعظم محمد شہباز شریف نے خیبرپختونخوا کے مختلف اضلاع شمالی و جنوبی وزیرستان اور بنّوں میں حالیہ سیکیورٹی آپریشنز کی کامیابی پر سیکیورٹی فورسز کو خراجِ تحسین پیش کیا ہے، جن میں مجموعی طور پر 34 مبینہ بھارتی حمایت یافتہ دہشتگرد ہلاک ہوئے، حکام نے اطلاع دی ہے۔
صدرِ مملکت آصف علی زرداری نے بھی مسلح افواج اور سیکیورٹی ایجنسیز کی کارکردگی کو خراجِ تحسین پیش کیا اور کہا کہ شمالی و جنوبی وزیرستان اور بنّوں میں دہشتگردوں کے خلاف کامیاب کارروائیاں قابلِ فخر ہیں۔
صدر نے واضح کیا کہ سیکیورٹی فورسز کی بروقت کارروائیوں سے ملک میں امن و استحکام کی صورتحال بہتر ہوئی ہے۔ اور انہوں نے تاکید کی کہ دہشتگردی کے مکمل خاتمے تک آپریشنز جاری رکھنا ہوں گے۔
صدر نے یہ بھی کہا کہ ریاست بھارتی حمایت یافتہ فتنۂ خوارج اور فتنہ الہندستان کو جڑ سے ختم کر دے گی۔ اس موقع پر ان کا پیغام تھا کہ قوم اپنی سیکیورٹی فورسز کے ساتھ کھڑی ہے اور ہر طرح کی دہشت گردی کو جڑ سے اکھاڑ پھینکیں گے۔
حکام نے بتایا ہے کہ سینیٹائزیشن اور انٹیلی جنس مبنی کارروائیاں جاری ہیں تاکہ علاقائی تحفظ کو یقینی بنایا جا سکے اور ممکنہ دیگر خطرات کا قلع قمع کیا جا سکے۔ وفاقی اور صوبائی سطح پر متعلقہ ادارے اِس سلسلے میں مربوط حکمتِ عملی اپنانے پر زور دے رہے ہیں۔
وزیراعظم شہباز شریف نے کہا کہ اسپن وام، جنوبی وزیرستان اور بنّو میں سیکیورٹی فورسز نے 34 بھارتی حمایت یافتہ دہشتگردوں کو جہنم رسید کیا۔
انہوں نے سیکیورٹی فورسز کی پیشہ ورانہ مہارت کو سراہتے ہوئے کہا کہ سیکیورٹی فورسز نے اپنی پیشہ ورانہ مہارت سے دہشتگردوں کے عزائم کو خاک میں ملایا۔
وزیراعظم نے مزید کہا کہ پاکستانی عوام کی حفاظت اور ملکی سالمیت کی خاطر دہشتگردی کے خلاف تمام ممکن اقدامات لیے جائیں گے۔ ان کا کہنا تھا کہ ملک سے دہشتگردی کی عفریت کے مکمل خاتمے تک انسدادِ دہشتگردی مہم مکمل تحریک کے ساتھ جاری رہے گی اور حکومت اس مقصد کے لیے پرعزم ہے۔
