پاکستان کرکٹ ٹیم کے سابق فاسٹ بولر سرفراز نواز نے اعلان کیا ہے کہ وہ اپنی سوانح عمری میں ایسے حقائق سامنے لانے والے ہیں جن پر برسوں سے پردہ ڈال دیا گیا تھا۔
یہ بھی پڑھیں:پاکستان کرکٹ بورڈ نے سابق ٹیسٹ کرکٹر سرفراز نواز کی پینشن بحال کردی
ان کا کہنا ہے کہ یہ وہ سچائیاں ہیں جنہیں جان بوجھ کر سایوں میں رکھا گیا اور کبھی منظرِ عام پر نہیں آنے دیا گیا۔
اپنے فیس بک ویڈیو بیان میں سرفراز نواز نے بتایا کہ وہ اُس خفیہ دنیا سے پردہ اٹھانے والے ہیں جسے جوا مافیا نے طویل عرصے تک چھپا رکھا تھا۔
ان کے مطابق برسوں تک وہ اکیلے کھڑے ہو کر اُن لوگوں کے خلاف لڑتے رہے جو خاموشی سے کھیلوں کو اپنے ذاتی مفاد کے لیے مسخ کرتے رہے۔
انہوں نے کہا کہ ان کی آنے والی کتاب میں میچ فکسنگ سمیت کئی ایسے انکشافات ہوں گے جن سے شائقینِ کرکٹ حیران رہ جائیں گے۔ سرفراز نواز کا کہنا تھا کہ اب وہ وہ باتیں بھی کہنے جا رہے ہیں جنہیں کہنے کی ہمت بہت سے لوگ کبھی نہ کر سکے۔
