ایشیا کپ انڈر19 فائنل میں 172 رنز کی اننگز کھیلنے والے سمیر منہاس نے کہا ہے کہ انڈیا سے پہلے میچ میں شکست کے بعد غلطیوں پر کام کیا جس پر اللہ نے عزت دی اور فائنل میں بھارت کو ہرا دیا۔
ایک ٹی وی پروگرام میں گفتگو کرتے ہوئے انہوں نے کہا کہ ٹورنامنٹ سے قبل فٹنس پر کام کیا، ملتان میں لگنے والے کیمپ میں خوب محنت کی جس کی وجہ سے ٹورنامنٹ میں مشکل پیش نہیں آئی۔ انہوں نے ایک سوال کے جواب میں بتایا کہ قومی کرکٹ ٹیم میں میرا پسندیدہ کھلاڑی بابر اعظم ہے۔
یہ بھی پڑھیے: ’آپ کی کامیابی قوم کے لیے باعث فخر ہے‘، فیلڈ مارشل عاصم منیر سے انڈر 19 ایشیا کپ کی فاتح ٹیم کی ملاقات
سمیر نے کہا کہ اس سے قبل میچ میں بھی اچھی اننگز کھیلی تھی جس کی وجہ سے پراعتماد تھا، فائنل فطری انداز میں کھیلا، میرا منصوبہ ڈبل سینچری کرنے کے بجائے ٹیم کا مجموعی اسکور 350 سے اوپر لے جانا تھا۔
انہوں نے کہا کہ وزیراعظم سے ملاقات ہوئی جنہوں نے حوصلہ افزائی کی، چیئرمین پی سی بی سے بھی ملاقات ہوئی جنہوں نے مبارکباد دی، ایئرپورٹ پر بہترین انداز میں استقبال ہوا۔
یہ بھی پڑھیے: آپ نے عوام کے دل جیت لیے: وزیراعظم کا انڈر 19 کرکٹ ٹیم کے ہر کھلاڑی کے لیے ایک ایک کروڑ روپے انعام کا اعلان
سمیر نے کہا کہ میچ کے دوران بھارتی کھلاڑیوں کا رویہ نامناسب تھا، ایک دوسرے کو گالیاں دے رہے تھے، یہ کرکٹ ہے اس میں اتنی جارحیت نہیں دکھانی چاہیے۔ ہم نے سوچا تھا کہ وہ اگر ہاتھ ملاتے ہیں تو ملائیں گے نہیں تو نہیں، ہم نے ڈسپلن سے کرکٹ کھیلنی تھی۔
انہوں نے اس عزم کا اظہار کیا کہ ایک دن وہ اور ان کے بھائی عرفان منہاس مل کر قومی ٹیم کے لیے کھیلیں گے۔
