بنگلہ دیش کے چیف ایڈوائزر پروفیسر محمد یونس نے کہا ہے کہ کہ ملک میں عام انتخابات طے شدہ شیڈول کے مطابق 12 فروری کو ہی منعقد ہوں گے۔
بنگلہ دیش کے چیف ایڈوائزر پروفیسر محمد یونس نے امریکی خصوصی ایلچی برائے جنوبی و وسطی ایشیا سرجیو گور کو یقین دہانی کرائی ہے کہ ملک میں عام انتخابات طے شدہ شیڈول کے مطابق 12 فروری کو ہی منعقد ہوں گے، جبکہ عبوری حکومت آزاد، منصفانہ اور پُرامن انتخابات کے انعقاد کے لیے مکمل طور پر پُرعزم ہے۔
ٹیلی فونک گفتگو کے دوران پروفیسر محمد یونس نے کہا کہ بنگلہ دیش کے عوام طویل عرصے کے آمرانہ طرزِ حکومت کے بعد اپنے جمہوری حقِ رائے دہی کے استعمال کے لیے بے حد پُرامید اور پُرجوش ہیں۔
یہ بھی پڑھیے پارلیمانی انتخابات و ریفرنڈم، بنگلہ دیش کی غیر ملکی سفارتکاروں کو فول پروف سیکیورٹی فراہم کرنے کی یقین دہانی
ان کا کہنا تھا کہ قوم اپنے ووٹ کا حق واپس حاصل کرنے کے لیے بے چینی سے انتخابات کی منتظر ہے، جو ایک آمرانہ نظام کے دوران عوام سے چھین لیا گیا تھا۔
تقریباً آدھے گھنٹے پر مشتمل یہ گفتگو شام ساڑھے 7 بجے ڈھاکا کے وقت کے مطابق ہوئی، جس میں بنگلہ دیش اور امریکا کے درمیان تجارت اور ٹیرف سے متعلق مذاکرات، آئندہ انتخابات کی تیاریوں، جمہوری انتقالِ اقتدار اور نوجوان سیاسی کارکن شریف عثمان ہادی کے قتل جیسے اہم معاملات پر تبادلۂ خیال کیا گیا۔
سرجیو گور، جو بھارت میں امریکا کے سفیر بھی ہیں، نے تجارتی مذاکرات میں بنگلہ دیش کی کامیابی پر چیف ایڈوائزر کو مبارکباد دی اور کہا کہ امریکی حکومت نے بنگلہ دیشی مصنوعات پر باہمی ٹیرف کم کرکے 20 فیصد کر دیا ہے۔ انہوں نے شہید عثمان ہادی کے جنازے میں عوام کی بڑی تعداد میں شرکت کا بھی حوالہ دیا۔
یہ بھی پڑھیے قتل کیس، حملے اور احتجاج: بنگلہ دیش میں قانون نافذ کرنے والے اداروں کو سخت ہدایات جاری کردی گئیں
گفتگو کے دوران چیف ایڈوائزر نے الزام عائد کیا کہ معزول حکومت کے حامی انتخابات کو سبوتاژ کرنے کے لیے بھاری رقوم خرچ کر رہے ہیں اور ان کی مفرور رہنما انہیں تشدد پر اکسا رہی ہے۔ تاہم انہوں نے واضح کیا کہ عبوری حکومت ان تمام چیلنجز سے نمٹنے کے لیے مکمل طور پر تیار ہے۔
پروفیسر محمد یونس نے کہا کہ انتخابات میں اب تقریباً 50 دن باقی ہیں اور حکومت کا ہدف ایک شفاف، منصفانہ اور پُرامن الیکشن کرانا ہے، جو ملک کی تاریخ میں ایک یادگار مثال بنے گا۔
اس موقع پر کامرس ایڈوائزر شیخ بشیرالدین، قومی سلامتی کے مشیر ڈاکٹر خلیل الرحمان اور ایس ڈی جیز کوآرڈینیٹر و سینئر سیکریٹری لامیہ مرشد بھی موجود تھیں۔
