سال نو کے آغاز کے ساتھ ہی مری میں موسم سرما کی پہلی برفباری نے اس سیاحتی مقام کی رونق دوبالا کردی ہے۔
پہاڑوں اور وادیوں پر برف کی سفید چادر بچھتے ہی سیاحوں میں خوشی کی لہر دوڑ گئی، جو نیو ایئر نائٹ پر خصوصی طور پر مری میں موجود تھے۔
یہ بھی پڑھیں: مری گلیات اور گردونواح میں طوفانی بارش اور برفباری کی پیشگوئی، سیاح احتیاطی تدابیر اختیار کریں
برف باری کے دوران باہر نکلے سیاح خوشی سے جھوم اٹھے اور جہاں قدرتی حسن سے بھرپور مناظر کو کیمروں کی آنکھ میں محفوظ کرنے میں مصروف نظر آئے، وہیں بعض نے آگ جلا کر رقص بھی کیا۔
مری میں جشن نو سال اور برفباری کا حسین موسم۔۔۔ دل مو لینے والے مناظر pic.twitter.com/akMsiNHerd
— Nadir Baloch (@BalochNadir5) December 31, 2025
سیاحوں کے غیر معمولی رش کے باعث ٹریفک کی روانی برقرار رکھنے کے لیے ضلعی انتظامیہ اور ٹریفک پولیس نے فول پروف انتظامات کیے تھے۔
انتظامیہ کی جانب سے پھلگراں اور 17 میل ٹول پلازہ پر رکاوٹیں قائم کر کے سینکڑوں گاڑیوں کو مزید آگے جانے سے روک دیا گیا، جبکہ مقامی شہریوں کو بھی عارضی طور پر ٹول پلازہ سے آگے جانے کی اجازت نہ دی گئی۔
مزید پڑھیں: ملک کے بیشتر علاقوں میں سردی برقرار جبکہ چند مقامات پر ہلکی بارش متوقع
انتظامیہ کے مطابق یہ اقدامات شہریوں اور سیاحوں کی جان و مال کے تحفظ کے پیش نظر کیے گئے ہیں۔
نیو ایئر نائٹ پر مسلسل برفباری کے باعث چیف ٹریفک آفیسر مری کی جانب سے جاری تفصیلی ٹریفک ایڈوائزری میں کہا گیا ہے کہ پھسلن زدہ سڑکوں پر سفر کے دوران ٹائر چین کا استعمال لازمی کیا جائے، گاڑیوں کو سڑک کنارے پارک کرنے کے بجائے صرف مقررہ پارکنگ ایریاز میں کھڑا کیا جائے۔
مری میں 2025 کے اختتامی لمحات میں سال کی پہلی برفباری۔ pic.twitter.com/cFZCeypo9o
— Rizwan Ghilzai (Remembering Arshad Sharif) (@rizwanghilzai) December 31, 2025
دوسری جانب موٹروے پولیس نے مری ایکسپریس وے پر اضافی نفری اور گاڑیاں تعینات کر دی ہیں۔ موٹروے پولیس کے مطابق برفباری کے باوجود ٹریفک کی روانی برقرار رکھنے کے لیے تمام مشینری متحرک ہے۔
شہریوں کو ہدایت کی گئی ہے کہ موسمی حالات کے پیش نظر غیر ضروری سفر سے اجتناب کریں، رفتار کم رکھیں اور اگلی گاڑی سے مناسب فاصلہ برقرار رکھیں۔
