شمالی وزیرستان میں کم عمر کرکٹر آئینہ وزیر کی وائرل ویڈیو بنانے والے نوجوان زعفران وزیر کو مبینہ طور پر اغوا کے بعد رہا کر دیا گیا۔ رہائی کے لیے مقامی قبائلی عمائدین، ضلعی انتظامیہ اور سوشل میڈیا صارفین کی جانب سے کوششیں کی گئیں، جبکہ واپسی پر علاقے میں خوشی کا اظہار کیا گیا۔
یہ بھی پڑھیں:وزیرستان کی کم عمر کرکٹر آئینہ جو محنت کی پچ پر کامیابی کی اننگز کھیلنا چاہتی ہیں
نوجوان زعفران وزیر کو مبینہ طور پر نامعلوم مسلح افراد نے شمالی وزیرستان کے علاقے شیواہ سے اغوا کر لیا تھا۔ اطلاعات کے مطابق گزشتہ روز دوپہر کے وقت مقامی طالبان انہیں اپنے ساتھ لے گئے تھے اور مطالبہ کیا تھا کہ وہ سوشل میڈیا پر وائرل ہونے والی آئینہ وزیر کی کرکٹ ویڈیو پر عوامی معافی مانگیں۔ شدت پسند عناصر کی جانب سے اس ویڈیو کو ’غیر اخلاقی‘ قرار دیا گیا تھا۔
واقعے کے بعد مقامی قبائلی مشران نے طالبان کے ساتھ مذاکرات شروع کیے جبکہ ضلعی انتظامیہ بھی متحرک رہی۔ ڈی پی او شمالی وزیرستان سجاد حسین کے مطابق واقعہ عصر کے بعد پیش آیا اور فوری طور پر پولیس اور مشران زعفران کی بازیابی کے لیے سرگرم ہو گئے تھے۔ انہوں نے یقین دہانی کرائی تھی کہ نوجوان کو جلد رہا کرا لیا جائے گا۔
رات کے وقت زعفران وزیر کا ایک ویڈیو بیان جاری کیا گیا جس میں انہوں نے ویڈیو بنانے پر معذرت کی۔ ویڈیو بیان کے بعد انہیں رہا کر دیا گیا۔ رہائی کی خبر سامنے آتے ہی علاقے میں خوشی کی فضا قائم ہوگئی۔ مقامی لوگوں نے زعفران وزیر کا استقبال کیا، انہیں ہار پہنائے گئے اور خوشی میں ہوائی فائرنگ بھی کی گئی۔ بڑی تعداد میں علاقہ مکین ان کے استقبال کے لیے جمع ہوئے۔
یہ بھی پڑھیں:خیبرپختونخوا کی کمسن کرکٹر نے دھوم مچا دی، جاوید آفریدی کا زلمی ویمن لیگ میں شامل کرنے کا اعلان
ادھر سوشل میڈیا پر بھی زعفران وزیر کی رہائی کے لیے آواز اٹھائی گئی۔ انسانی حقوق کے کارکنان اور مختلف حلقوں نے کہا کہ انتہا پسندی ٹیلنٹ کو خاموش نہیں کر سکتی۔ بعض صارفین نے مالالہ فنڈ سمیت متعلقہ اداروں سے آئینہ وزیر کی تعلیم اور کھیل کے حق کے تحفظ کے لیے تعاون کی اپیل بھی کی۔
Some say TTP militants & local elders are in talks for the release of Zafar Wazir who filmed Aina’s cricket video. terrorists are demanding a public apology, calling it “obscene.” Save Zafar. Protect Aina. Extremism must not silence talent. @MalalaFund should support Aina’s edu.. pic.twitter.com/2CqbWugL60
— Arshad Yousafzai (@Arshadyousafzay) February 20, 2026
یاد رہے کہ چند روز قبل شمالی وزیرستان کی کم عمر بچی آئینہ وزیر کی کرکٹ کھیلتے ہوئے ویڈیو سوشل میڈیا پر وائرل ہوئی تھی، جس میں وہ بڑے اعتماد کے ساتھ بالنگ اور بیٹنگ کرتی دکھائی دیں۔ ویڈیو نے نہ صرف ان کی صلاحیتوں کو اجاگر کیا بلکہ نوجوانوں میں کھیل کے لیے حوصلہ بھی بڑھایا۔
پاکستان سپر لیگ کی فرنچائز پشاور زلمی کے چیئرمین جاوید آفریدی نے آئینہ وزیر کی صلاحیتوں کو سراہتے ہوئے اعلان کیا تھا کہ انہیں آئندہ زلمی ویمن لیگ میں شامل کیا جائے گا۔ ان کا کہنا تھا کہ زلمی ویمن لیگ کا مقصد لڑکیوں کو کھیلنے، اظہارِ صلاحیت اور دوسروں کے لیے مثال بننے کا موقع فراہم کرنا ہے، اور ابھرتے ہوئے ٹیلنٹ کو درست پلیٹ فارم دینا وقت کی اہم ضرورت ہے۔
