پاکستان پیپلز پارٹی کے پنجاب اسمبلی میں پارلیمانی لیڈر سید علی حیدر گیلانی نے ایران پر اسرائیلی اور امریکی حملے کی شدید مذمت کرتے ہوئے آیت اللہ خامنہ ای کی شہادت پر گہرے دکھ اور افسوس کا اظہار کیا ہے۔
مزید پڑھیں: پاکستان ایرانی قوم کے ساتھ ہے، صدر مملکت آصف زرداری کا آیت اللہ خامنہ ای کی شہادت پر اظہار افسوس
اپنے ایک بیان میں سید علی حیدر گیلانی نے کہاکہ پوری قوم اپنے ایرانی بھائیوں کے ساتھ تعزیت کا اظہار کرتی ہے، رہبرِ معظم آیت اللہ خامنہ ای کی شہادت کے بعد ہر پاکستانی دکھی اور رنجیدہ ہے۔ امتِ مسلمہ کے دل ایک ساتھ دھڑکتے ہیں۔
انہوں نے کہاکہ دشمن اس سوگ اور غصے کو پاکستان میں عدم استحکام پھیلانے کے لیے استعمال کرنا چاہتا ہے، اس لیے ہمیں جذباتی ہونے کے بجائے ہوش مندی سے سوچنا ہوگا۔
ان کے مطابق دشمن شرپسندی اور فرقہ ورانہ فسادات پھیلا کر پاکستان کو اندرونی طور پر کھوکھلا کرنا چاہتا ہے۔
سید علی حیدر گیلانی نے کہاکہ پاکستان ایران کا دوست اور مضبوط دست و بازو رہا ہے اور اس وقت تمام سازشوں کے باوجود پاکستان اپنے برادر ملک ایران کے ساتھ سیسہ پلائی ہوئی دیوار بن کر کھڑا ہے۔
مزید پڑھیں: وزیراعظم شہباز شریف کا اردن کے فرمانروا سے ٹیلیفونک رابطہ، خطے کی صورتحال پر تبادلہ خیال
انہوں نے مزید کہاکہ گزشتہ رات اقوام متحدہ کی سلامتی کونسل کے اجلاس میں ایران کا پاکستان کے لیے اظہارِ تشکر دوستی اور ہم آہنگی کا منہ بولتا ثبوت ہے جسے دشمن توڑنے میں ناکام رہا ہے۔
