لیبیا سے مجموعی طور پر 165 بنگلہ دیشی شہری رضاکارانہ واپسی کے پروگرام کے تحت اپنے وطن واپس پہنچ گئے ہیں۔
اس پروگرام کو لیبیا میں بنگلہ دیشی سفارت خانے، وزارتِ خارجہ اور وزارتِ تارکینِ وطن بہبود و بیرونِ ملک روزگار نے انٹرنیشنل آرگنائزیشن فار مائیگریشن اور لیبیائی حکام کے تعاون سے ممکن بنایا۔
سرکاری اعلامیے کے مطابق واپس آنے والے افراد جمعہ کی صبح 5:30 بجے براق ایئر کی پرواز کے ذریعے ڈھاکہ پہنچے۔
یہ بھی پڑھیں: بنگلہ دیش کے 73 ماہی گیر میانمار کی قید سے آزاد کروالیے گئے
اس گروپ میں 143 بنگلہ دیشی شہری شامل تھے جو بن غازی کے گنفودا حراستی مرکز میں قید تھے۔
جبکہ 22 دیگر افراد بن غازی اور اس کے نواح میں رہنے والے پریشان حال، کمزور اور جسمانی طور پر بیمار بنگلہ دیشی تھے۔
حکام کے مطابق زیادہ تر تارکینِ وطن انسانی اسمگلروں کے جھانسے میں آ کر غیر قانونی طور پر لیبیا پہنچے تھے، جہاں انہیں سمندر کے راستے یورپ پہنچانے کے وعدے کیے گئے تھے۔
اطلاعات کے مطابق ان میں سے کئی افراد کو لیبیا میں قیام کے دوران اغوا، بدسلوکی اور استحصال کا سامنا کرنا پڑا۔
مزید پڑھیں: مشرقِ وسطیٰ کشیدگی: پروازیں معطل، ہزاروں بنگلہ دیشی محنت کش پھنس گئے
وزارتِ خارجہ، دیگر متعلقہ سرکاری اداروں اور آئی او ایم کے نمائندوں نے ڈھاکہ ایئرپورٹ پر واپس آنے والوں کا استقبال کیا۔
حکام نے ان تارکینِ وطن کو یہ بھی ترغیب دی کہ وہ اپنی مشکلات اور تجربات عوام کے ساتھ شیئر کریں تاکہ غیر قانونی ہجرت کے خطرات کے بارے میں آگاہی پیدا کی جا سکے۔
انٹرنیشنل آرگنائزیشن فار مائیگریشن کی جانب سے ہر واپس آنے والے فرد کو سفر میں معاونت، خوراک، بنیادی طبی سہولتیں اور ضرورت پڑنے پر عارضی رہائش فراہم کی گئی۔
