ڈیجیٹل میڈیا پلیٹ فارم وی نیوز نے کامیابی کے 3 سال مکمل کرلیے ہیں۔
وی نیوز کی تیسری سالگرہ پر وفاقی وزرا اور مختلف سیاسی جماعتوں کے اراکین پارلیمنٹ کی جانب سے مبارکباد کا سلسلہ جاری ہے۔
وی نیوز حقائق پر مبنی رپورٹنگ کرتا ہے، وزیر اطلاعات
وفاقی وزیر اطلاعات و نشریات عطااللہ تارڑ نے اپنے پیغام میں کہاکہ میں وی نیوز کو دل سے مبارکباد پیش کرتا ہوں، یہ ایک اچھا ڈیجیٹل پلیٹ فارم ہے جو حقائق پر مبنی رپورٹنگ کرتا ہے۔
انہوں نے کہا کہ رپورٹنگ کے ساتھ ساتھ وی نیوز کا پوڈکاسٹ سسٹم بھی نہایت مؤثر اور معیاری ہے۔
ان کے مطابق وی نیوز پاکستان کے مثبت تشخص کو اجاگر کرنے میں اہم کردار ادا کر رہا ہے۔
عطااللہ تارڑ نے کہا کہ آرٹس، ثقافت، خوراک، موسیقی اور قومی نوعیت کے ایسے مسائل جن کا تعلق صرف سیاست سے نہیں بلکہ معاشرتی زندگی کے دیگر پہلوؤں سے بھی ہے، ان کی بھرپور اور متوازن کوریج کی جاتی ہے۔ ان کے بقول وی نیوز ایک بہترین اور مؤثر پلیٹ فارم کے طور پر ابھر کر سامنے آیا ہے۔
وی نیوز نے معیاری رپورٹنگ کے ذریعے اپنا نام بنایا، بیرسٹر گوہر
تحریک انصاف کے چیئرمین بیرسٹر گوہر علی نے اپنے پیغامِ میں کہاکہ وہ وی نیوز کی تیسری سالگرہ کے موقع پر چیف ایڈیٹر عمار مسعود اور ان کی پوری ٹیم کو دل کی گہرائی سے مبارکباد پیش کرتے ہیں۔
انہوں نے کہا کہ وی نیوز نے اب تک بہت عمدہ کارکردگی کا مظاہرہ کیا ہے، متوازن صحافت کو فروغ دیا ہے اور معیاری رپورٹنگ کے ذریعے اپنا ایک نمایاں مقام بنایا ہے۔
ان کا کہنا تھا کہ امید ہے وی نیوز کی ٹیم آئندہ بھی اسی جذبے اور پیشہ ورانہ انداز کے ساتھ اپنے اس سفر کو جاری رکھے گی۔
نفیسہ شاہ، آغا رفیع اللہ اور دیگر کی بھی وی نیوز ٹیم کو مبارکباد
وی نیوز کی تیسری سالگرہ پر مبارکباد دینے والوں میں پیپلز پارٹی کی رکن قومی اسمبلی نفیسہ شاہ، آغا رفیع اللہ، ن لیگ کے سینیٹر افنان اللہ، ایم این اے طاہرہ اورنگزیب، تحریک انصاف کے اراکین اسمبلی ڈاکٹر نثار جٹ، عادل خان بازئی، ایم کیو ایم کے رکن اسمبلی سید حفیظ الدین بھی شامل ہیں۔
