میٹا نے بدھ کے روز اعلان کیا کہ وہ فیس بک، واٹس ایپ اور میسنجر میں مزید اسکیم ڈیٹیکشن ٹولز متعارف کرا رہا ہے۔ کمپنی کا کہنا ہے کہ یہ فیچرز صارفین کو کسی مشتبہ سرگرمی سے قبل ہی خبردار کریں گے، کیونکہ اسکمرز اکثر فوری نقصان پہنچانے کے بجائے ابتدا میں چھپ کر کام کرتے ہیں۔
فیس بک پر نئے الرٹس
میٹا فیس بک پر نئے دوست درخواستوں (فرینڈ ریکویسٹ) کے لیے الرٹس کی جانچ کر رہا ہے۔ اگر کسی اکاؤنٹ میں مشتبہ سرگرمی کے آثار ہوں، جیسے کم مشترکہ دوست یا مختلف ملک کی لوکیشن، تو صارفین کو الرٹ دکھایا جائے گا تاکہ وہ فیصلہ کر سکیں کہ درخواست قبول یا بلاک کرنی ہے۔
واٹس ایپ میں ڈیوائس لنکنگ الرٹس
واٹس ایپ پر صارفین کو خبردار کرنے کے لیے ڈیوائس لنکنگ الرٹس متعارف کرائے گئے ہیں، تاکہ اسکمرز صارفین کو اپنی واٹس ایپ ڈیوائس سے جوڑنے کی کوشش نہ کر سکیں۔
میٹا کی بلاگ پوسٹ کے مطابق، اسکمرز کبھی کبھی ٹیلنٹ کمپٹیشن یا جعلی ووٹنگ کے بہانے صارفین سے فون نمبر اور ڈیوائس لنکنگ کوڈ مانگ سکتے ہیں، یا جعلی کیو آر کوڈ اسکین کروانے کی کوشش کر سکتے ہیں۔ نئے الرٹس ایسے مشکوک لنکنگ درخواستوں پر صارفین کو خبردار کریں گے۔
میسنجر میں ایڈوانس اسکیم ڈیٹیکشن
میسنجر میں ایڈوانس اسکیم ڈیٹیکشن اس ماہ مزید ممالک میں متعارف ہو رہا ہے۔ اس ٹول کے ذریعے نئے رابطوں کے چیٹس میں اسکیمز سے متعلق پیٹرنز، جیسے مشکوک جاب آفرز، پہچان کر صارفین کو خبردار کیا جائے گا اور درخواست کی جائے گی کہ وہ چیٹ میسجز اسکیم ریویو کے لیے شئیر کریں۔ اگر اسکیم کی تصدیق ہو گئی تو صارف کو اکاؤنٹ بلاک یا رپورٹ کرنے کی ہدایت دی جائے گی۔
میٹا کی کارکردگی
میٹا نے بتایا کہ پچھلے سال 159 ملین سے زائد اسکیم اشتہارات ہٹا دیے گئے، جن میں سے 92٪ بغیر کسی رپورٹ کے قبل از وقت ہٹا دیے گئے۔ اسی طرح فیس بک اور انسٹاگرام پر 10.9 ملین اکاؤنٹس جنہیں کریمنل اسکیم سینٹرز سے منسلک پایا گیا، ختم کر دیے گئے۔
یہ اقدامات صارفین کی حفاظت کو بڑھانے اور آن لائن اسکیمز سے بچاؤ کو یقینی بنانے کے لیے کیے جا رہے ہیں۔
