اسلام آباد کی نیشنل یونیورسٹی آف سائنسز اینڈ ٹیکنالوجی (نسٹ) کے کیمپس میں تیندوا دیکھنے کی اطلاع موصول ہوئی، جس کے بعد انتظامیہ اور وائلڈ لائف حکام متحرک ہو گئے۔
چند روز قبل انٹرنیشنل اسلامک یونیورسٹی میں بھی تیندوا گھومتے ہوئے دیکھا گیا تھا، جس سے طلبہ اور عملے میں خدشات پیدا ہو گئے تھے۔
نسٹ میں تیندوا دیکھے جانے کے بعد اسلام آباد وائلڈ لائف مینجمنٹ بورڈ نے فوری اقدامات کیے اور تیندوا پکڑنے کے لیے کیمپس میں ٹریپر لگایا۔
عہدیداروں کے مطابق ٹریپر کے ذریعے تیندوا محفوظ طریقے سے پکڑا جائے گا اور اسے بعد ازاں جنگلی حیات کے محفوظ مقام پر منتقل کیا جائے گا تاکہ طلبہ اور کیمپس اسٹاف کی حفاظت یقینی بنائی جا سکے۔
اسلام آباد وائلڈ لائف حکام نے عوام سے بھی اپیل کی ہے کہ اگر کسی نے تیندوا یا دیگر جنگلی جانور کو شہری علاقوں میں دیکھا تو فوری طور پر متعلقہ حکام کو اطلاع دے تاکہ کسی بھی حادثے سے بچا جا سکے۔
