مشرقِ وسطیٰ میں جاری کشیدہ صورتِ حال اور تیل کی عالمی قیمتوں میں اضافے نے برطانیہ میں ایندھن کے بحران کی صورتِ حال پیدا کر دی ہے، اور بڑے شہروں کے متعدد پیٹرول پمپوں پر گاڑیوں کی لمبی قطاریں دیکھنے میں آ رہی ہیں۔
برطانوی میڈیا رپورٹس کے مطابق مشرقِ وسطیٰ میں جنگی حالات اور تیل پیدا کرنے والے ممالک میں پیدا ہونے والے اضطراب نے عالمی خام تیل کی قیمتوں میں اضافہ کر دیا ہے، جس کے اثرات برطانیہ میں براہِ راست محسوس کیے جا رہے ہیں۔ اس کے نتیجے میں ملک بھر کے پیٹرول اسٹیشنز پر ڈرائیورز ایندھن کے لیے لمبے وقت تک انتظار کر رہے ہیں۔
یہ بھی پڑھیں:تیل کی بڑھتی قیمتوں میں عوامی ریلیف: وزیراعظم کی آئی ایم ایف سے پیٹرولیم لیوی پر بات چیت کی ہدایت
لندن، بیرمنگھم، منچسٹر اور دیگر شہروں میں گیس اسٹیشنوں کے باہر گاڑیوں کی قطاریں کئی کلومیٹر تک پھیلی ہوئی ہیں، جبکہ کچھ مقامات پر ڈیزل اور پیٹرول دونوں ایندھن کی قلت کے باعث صارفین کو سخت مشکلات کا سامنا ہے۔ مقامی رہائشیوں نے میڈیا کو بتایا کہ اکثر اسٹیشنز پر پٹرول ختم ہو جاتا ہے، جس کے بعد لوگ صبح سویرے یا رات دیر تک انتظار کرتے ہیں تاکہ وہ دوبارہ ٹینک بھروا سکیں۔
اقتصادی ماہرین کا کہنا ہے کہ مشرقِ وسطیٰ میں جاری تنازعے نے عالمی تیل مارکیٹ میں عدم استحکام پیدا کر دیا ہے، جس کے باعث خام تیل کی قیمتیں بڑھ رہی ہیں۔ اس اضافے نے برطانیہ میں ایندھن کی قیمتوں کو بھی بڑھا دیا ہے، جس سے عام صارفین براہِ راست متاثر ہو رہے ہیں۔
برطانوی ڈرائیورز کا کہنا ہے کہ ایندھن کے بڑھتے ریٹس اور اسٹیشنوں پر لمبی قطاروں نے روزمرہ کی زندگی کو مشکل بنا دیا ہے، خاص طور پر ان لوگوں کے لیے جو روزانہ طویل فاصلوں تک سفر کرتے ہیں۔ ایک ڈرائیور نے بتایا کہ ہم صبح سے لائن میں کھڑے ہیں، لیکن گھنٹوں انتظار کے باوجود ہمیں پٹرول نہیں مل سکا۔
برطانوی حکومت کے نمائندے نے عوام کو کہا ہے کہ وہ غیر ضروری پیٹرول استعمال سے گریز کریں اور ٹرانسپورٹ کے متبادل ذرائع پر غور کریں۔ حکومت کا کہنا ہے کہ عالمی منڈی میں تیل کی صورتحال کو قریب سے مانیٹر کیا جا رہا ہے اور ممکنہ حل تلاش کیے جا رہے ہیں تاکہ آئندہ کم از کم مشکل حالات کا سامنا نہ کرنا پڑے۔
یہ بھی پڑھیں:روسی پیٹرولیم مصنوعات درآمد کرنے کے لیے بنگلہ دیش کی امریکا سے خصوصی استثنیٰ کی اپیل
اقتصادی تجزیہ کاروں کے مطابق اگر مشرقِ وسطیٰ میں صورتِ حال بہتر نہ ہوئی تو برطانیہ میں گو نہ صرف ایندھن کی قیمتوں میں مزید اضافہ متوقع ہے بلکہ عوامی نقل و حمل پر بھی دباؤ بڑھ سکتا ہے۔
