بالی ووڈ اداکار ابھیشیک بچن نے اپنی اہلیہ ایشوریا رائے کے ساتھ طویل ازدواجی زندگی سے متعلق اہم انکشافات کرتے ہوئے کہا ہے کہ ان کی شادی میں ‘ایگو’ یعنی انا کا مثبت کردار رہا ہے۔
ایک حالیہ انٹرویو میں ابھیشیک بچن نے میزبان للی سنگھ سے گفتگو کرتے ہوئے اپنی شادی، خاندانی زندگی اور بیٹی آرادھیا بچن کی پرورش کے حوالے سے کھل کر بات کی۔ انہوں نے کہا کہ وہ اور ایشوریا رائے ہمیشہ سے اپنی رفاقت کو شراکت داری کے طور پر دیکھتے آئے ہیں۔
یہ بھی پڑھیے: راجپال یادو اور امیتابھ بچن کے تعلقات کا چیک باؤنس کیس میں انکشاف
ابھیشیک بچن نے کہا کہ ‘یہ کبھی ایسا معاملہ نہیں تھا کہ میں کما کر لاؤں گا اور وہ گھر سنبھالیں گی، بلکہ سب کچھ قدرتی انداز میں چلتا رہا’۔ انہوں نے مزید کہا کہ ان کے نزدیک انا کا مطلب منفی نہیں بلکہ یہ ہے کہ وہ یہ نہیں چاہتے کہ ان کی کامیابی کے لیے کوئی دوسرا پیچھے ہٹے۔
انہوں نے کہا کہ ‘میں ایسی شادی نہیں چاہتا جہاں میری بیوی کو صرف اس لیے اپنے کیریئر سے پیچھے ہٹنا پڑے کہ مجھے خود کو زیادہ مردانہ محسوس کرنا ہے، اور خوش قسمتی سے میری اہلیہ بھی ایسا نہیں سوچتیں’۔
اداکار نے یہ بھی بتایا کہ انہوں نے ایشوریا رائے کو اپنے کیریئر کے آغاز سے جانا، اور ان کی دوسری فلم ‘ڈھائی اکشر پریم کے’ میں وہ ایک ساتھ کام کر چکے تھے، تاہم اس وقت دونوں صرف دوست تھے۔
یہ بھی پڑھیے: ابھیشیک بچن نے ایشوریا رائے سے طلاق کی افواہوں پر خاموشی توڑ دی، صحافیوں کو کیا کہا؟
ابھیشیک بچن نے والدین کے کردار پر بات کرتے ہوئے کہا کہ باپ اکثر اچھے استاد ثابت نہیں ہوتے کیونکہ جذبات آڑے آ جاتے ہیں، جبکہ مائیں زیادہ حساس ہوتی ہیں۔ ان کے مطابق بچوں کی تربیت میں نصیحت کے بجائے عملی مثال دینا زیادہ مؤثر ہوتا ہے۔
انہوں نے کہا کہ وہ اور ایشوریا رائے اپنی بیٹی کے لیے ایک بہترین مثال بننے کی کوشش کرتے ہیں تاکہ وہ خود سیکھ سکے کہ درست کیا ہے۔
واضح رہے کہ ابھیشیک بچن اور ایشوریا رائے کی شادی 20 اپریل 2007 کو ہوئی تھی اور رواں سال وہ اپنی شادی کے 19 سال مکمل کریں گے۔
