ٹائٹینک حادثے سے زندہ بچ جانے والے ایک مسافر کی جانب سے استعمال کیا گیا لائف جیکٹ نیلامی میں 9 لاکھ ڈالر سے زائد میں فروخت ہو گیا ہے، جو ابتدائی اندازوں سے کہیں زیادہ قیمت ہے۔
برطانوی شہر ڈیویزز میں منعقدہ نیلامی میں یہ نایاب لائف جیکٹ 6 لاکھ 70 ہزار پاؤنڈ (تقریباً 9 لاکھ 6 ہزار ڈالر) میں ایک نامعلوم خریدار نے خریدی۔
یہ لائف جیکٹ پہلی کلاس کی مسافر لورا میبل فرانساتیلی نے 1912 میں ٹائٹینک کے ڈوبنے کے دوران استعمال کی تھی اور یہ اپنی نوعیت کی انتہائی نایاب اشیاء میں شمار ہوتی ہے۔ ماہرین کے مطابق اب تک اس قسم کی بہت کم لائف جیکٹس نیلامی کے لیے پیش کی گئی ہیں۔
یہ بھی پڑھیے: ٹائٹینک کے ملبے کی جانب جانے والی آبدوز ’ٹائیٹن‘ کیوں تباہ ہوئی؟ وجوحات سامنے آگئیں
اسی نیلامی میں ایک اور تاریخی شے، ٹائٹینک کی لائف بوٹ کی نشست کا کشن بھی تقریباً 5 لاکھ 27 ہزار ڈالر میں فروخت ہوا۔ یہ شے امریکہ کی ٹائٹینک میوزیم کے مالکان نے خریدی۔
نیلام گھر کے مطابق یہ بلند قیمتیں ٹائٹینک حادثے اور اس سے جڑی تاریخ میں لوگوں کی مسلسل دلچسپی اور متاثرہ افراد کے احترام کی عکاسی کرتی ہیں۔
واضح رہے کہ ٹائٹینک 1912 میں اپنے پہلے سفر کے دوران آئس برگ سے ٹکرانے کے بعد شمالی بحرِ اوقیانوس میں ڈوب گیا تھا، جس میں سینکڑوں افراد جان کی بازی ہار گئے تھے۔
