پاکستان مسلم لیگ (ن) کے سینیئر رہنما خواجہ سعد رفیق نے کہا ہے کہ پارٹی کے اندر اگرچہ مختلف نام موجود ہیں، تاہم سب ایک ہی سوچ کے تحت متحد ہو کرکام کر رہے ہیں۔
میڈیا سے گفتگو کرتے ہوئے انہوں نے وزیراعلیٰ پنجاب مریم نواز کے ترقیاتی منصوبوں کو سراہتے ہوئے ان کا شکریہ ادا کیا۔
انہوں نے کہاکہ حکومت کے قیام کے وقت انہیں بعض تحفظات لاحق تھے، اسی وجہ سے وہ کابینہ کا حصہ نہیں بنے، تاہم وزیراعظم شہباز شریف کی شب و روز محنت قابل تعریف ہے۔
ان کے بقول موجودہ حالات میں حکومت اور ملٹری اسٹیبلشمنٹ ایک صفحے پر ہیں اور سیاسی و عسکری قیادت نے مشترکہ حکمت عملی سے ملک کو ڈیفالٹ سے بچایا، اگرچہ بعد ازاں آئی ایم ایف پروگرام، مہنگائی اور سیلاب جیسے چیلنجز کا سامنا بھی کرنا پڑا۔
خواجہ سعد رفیق نے کہاکہ پہلگام واقعے کو جواز بنا کر بھارت نے پاکستان کے خلاف جارحیت کی، تاہم پاکستان کی مسلح افواج اور فضائیہ نے مؤثر جواب دے کر اپنی صلاحیتوں کا لوہا منوایا۔
انہوں نے کہاکہ عالمی سطح پر پاکستان کا مثبت تاثر ابھر رہا ہے اور اب وقت آگیا ہے کہ شہباز شریف سمیت دیگر قیادت بین الاقوامی تنازعات کے حل میں فعال کردار ادا کرے۔
انہوں نے امریکی صدر ڈونلڈ ٹرمپ کے حوالے سے کہاکہ وہ بھی پاکستان کی تعریف کررہے ہیں۔
ان کا کہنا تھا کہ غزہ میں جاری مظالم نے دنیا کو ہلا کر رکھ دیا ہے اور یہ صورتحال ایک نئے عالمی نظام کی تشکیل کی جانب اشارہ کر رہی ہے۔
انہوں نے مزید کہاکہ چین اور روس جیسی بڑی طاقتیں بھی اس عمل کا حصہ ہیں، توقع ہے کہ خطے میں امن قائم ہوگا جبکہ مسلم دنیا میں بیداری کی لہر ابھر رہی ہے۔
