معروف ٹک ٹاکر کاشف ضمیر کے خلاف مبینہ فراڈ کا ایک اور معاملہ سامنے آیا ہے، جس میں ان پر محکمہ انسداد دہشتگردی (سی ٹی ڈی) کے ایک اہلکار سے لاکھوں روپے لینے کا الزام عائد کیا گیا ہے۔
میڈیا رپورٹس کے مطابق پولیس نے واقعے کے بعد ملزم کی گرفتاری کے لیے کارروائیاں شروع کر دی ہیں۔
میڈیا رپورٹس میں کہا گیا ہے کہ سی ٹی ڈی کے اہلکار دوست محمد کے مطابق کاشف ضمیر نے انہیں بیرون ملک، خصوصاً اٹلی بھجوانے کا لالچ دے کر 19 لاکھ روپے وصول کیے۔
انہوں نے دعویٰ کیاکہ رقم لینے کے بعد کاشف ضمیر نے رابطہ منقطع کر دیا اور گزشتہ ایک سال سے ان کی کالز بھی نہیں سن رہے۔
متاثرہ اہلکار کی درخواست پر تھانہ گلبرگ میں کاشف ضمیر کے خلاف مقدمہ درج کر لیا گیا ہے، جس کے بعد پولیس نے ڈیفنس میں واقع ان کی رہائش گاہ پر چھاپہ بھی مارا۔
رپورٹ کے مطابق دوست محمد جو سی ٹی ڈی کراچی میں تعینات ہیں، کا کہنا ہے کہ کاشف ضمیر سے ان کی دوستی 2 سال قبل ٹک ٹاک پر ہوئی تھی اور وہ کراچی آکر ان کے پاس قیام بھی کرتے رہے ہیں۔
