یورپی یونین اور پاکستان کے درمیان تجارت و سرمایہ کاری کے فروغ کے لیے اعلیٰ سطح یورپی یونین پاکستان بزنس فورم آج اسلام آباد میں شروع ہو رہا ہے۔
یہ 2 روزہ فورم ایسے وقت میں منعقد ہو رہا ہے جب پاکستان اپنے سب سے بڑے برآمدی منڈی اور چین کے بعد دوسرے بڑے تجارتی شراکت دار یورپی یونین کے ساتھ اقتصادی تعلقات کو مزید مستحکم کرنے کی کوشش کر رہا ہے۔
پاکستان کی برآمدات میں خاص طور پر ٹیکسٹائل شعبہ نمایاں ہے، جو ترجیحی تجارتی سہولتوں کے تحت یورپی منڈی تک رسائی حاصل کرتا ہے۔
فورم کی میزبانی پاکستان میں یورپی یونین کے وفد نے رکن ممالک اور پاکستانی حکومت کے اشتراک سے کی ہے، جس میں پالیسی سازوں، کمپنیوں کے سربراہان، سرمایہ کاروں اور بین الاقوامی مالیاتی اداروں کے نمائندگان شرکت کر رہے ہیں۔
وزیر اعظم شہباز شریف کے مطابق پاکستان اور یورپی یونین کے تعلقات میں اقتصادی اور تجارتی روابط کلیدی حیثیت رکھتے ہیں۔ انہوں نے کہا کہ یہ فورم مذاکرات سے عملی معاہدوں کی جانب پیشرفت کا بہترین موقع فراہم کرتا ہے اور یورپی کاروباری برادری کو پاکستان میں سرمایہ کاری کے مواقع سے فائدہ اٹھانے کی دعوت دی۔
یورپی حکام کے مطابق پاکستان میں 300 سے زائد یورپی کمپنیاں کام کر رہی ہیں، جبکہ جی ایس پی پلس اسکیم کے تحت پاکستان کو متعدد برآمدات پر کم یا صفر ٹیرف کی سہولت حاصل ہے، جس کے بدلے انسانی حقوق، لیبر قوانین اور گورننس اصلاحات کی پاسداری لازم ہے۔
فورم کے دوران ٹیکسٹائل، زراعت، فارماسیوٹیکل، صحت کے آلات، قابلِ تجدید توانائی اور گرین لاجسٹکس سمیت مختلف شعبوں میں سرمایہ کاری کے مواقع پر غور کیا جائے گا۔
مزید پڑھیں: وزیرخزانہ محمد اورنگزیب کی یورپی یونین کے سفیر سے ملاقات، ملکی معیشت اور سرمایہ کاری پر تبادلہ خیال
اس کے علاوہ بزنس ٹو بزنس اور بزنس ٹو گورنمنٹ روابط کو فروغ دینے اور مالیاتی اداروں کے ساتھ اشتراک کے امکانات بھی تلاش کیے جائیں گے، خاص طور پر گلوبل گیٹ وے اقدام کے تناظر میں۔
وزیر اعظم نے کہا کہ قریباً 70 کروڑ آبادی پر مشتمل دونوں خطوں کے درمیان تجارت اور سرمایہ کاری میں نمایاں اضافہ ممکن ہے، جبکہ زراعت، معدنیات، آئی ٹی، جدید مینوفیکچرنگ، انفراسٹرکچر، بلیو اکانومی اور ہوا بازی جیسے شعبوں میں وسیع مواقع موجود ہیں۔
