گوگل نے امریکی محکمۂ دفاع (Pentagon) کے ساتھ ایک نیا معاہدہ کیا ہے جس کے تحت اس کے مصنوعی ذہانت (اے آئی) ماڈلز کو خفیہ اور حساس سرکاری مقاصد کے لیے استعمال کیا جا سکے گا۔ یہ بات ’دی انفارمیشن‘ کی ایک رپورٹ میں بتائی گئی ہے، جس نے معاملے سے واقف ایک شخص کا حوالہ دیا ہے۔
رپورٹ کے مطابق اس معاہدے کے تحت امریکی محکمۂ دفاع کو گوگل کی اے آئی ٹیکنالوجی ’کسی بھی قانونی حکومتی مقصد‘ کے لیے استعمال کرنے کی اجازت ہوگی۔ اس پیش رفت کے بعد گوگل ان بڑی ٹیکنالوجی کمپنیوں کی فہرست میں شامل ہو گیا ہے جو خفیہ دفاعی استعمال کے لیے اے آئی فراہم کر رہی ہیں، جن میں OpenAI اور ایلون مسک کی کمپنی xAI بھی شامل ہیں۔
یہ بھی پڑھیں: کیا اے آئی جمہوری نظام کے لیے بھی خطرہ ثابت ہوسکتی ہے؟
خفیہ نیٹ ورکس عام طور پر انتہائی حساس دفاعی کاموں کے لیے استعمال کیے جاتے ہیں، جن میں مشن کی منصوبہ بندی اور بعض صورتوں میں ہتھیاروں کی ہدف بندی جیسے امور شامل ہوتے ہیں۔
رپورٹ میں بتایا گیا ہے کہ امریکی محکمۂ دفاع نے 2025 میں بڑی AI کمپنیوں، جن میں Anthropic، OpenAI اور گوگل شامل ہیں، کے ساتھ تقریباً 200 ملین ڈالر تک کے معاہدے کیے ہیں۔ ان معاہدوں کا مقصد دفاعی نظام میں مصنوعی ذہانت کے استعمال کو وسعت دینا اور اس سلسلے میں زیادہ لچک برقرار رکھنا ہے۔
یہ بھی پڑھیں: اے آئی چیٹ بوٹ کلاڈ صارفین کے پاسپورٹ مانگنے لگا، وجہ کیا ہے؟
گوگل کے معاہدے میں یہ بھی شامل ہے کہ کمپنی حکومتی درخواست پر اپنی AI سسٹمز کی حفاظتی ترتیبات اور فلٹرز میں ضروری ترامیم کرنے میں معاونت کرے گی۔
دستاویز کے مطابق اس بات پر بھی اتفاق کیا گیا ہے کہ AI نظام کو بغیر مناسب انسانی نگرانی کے داخلی نگرانی یا خودکار ہتھیاروں، بشمول ہدف کے انتخاب، کے لیے استعمال نہیں کیا جانا چاہیے۔ تاہم معاہدہ اس بات کی بھی وضاحت کرتا ہے کہ حکومت کے آپریشنل فیصلوں پر کمپنی کو ویٹو یا کنٹرول کا حق حاصل نہیں ہوگا۔
یہ بھی پڑھیں: کیا ایف آئی اے کی جدید اے آئی ٹیکنالوجی مجرموں کو پکڑنے میں مدد دے گی؟
گوگل کے پبلک سیکٹر یونٹ کے ترجمان نے ’دی انفارمیشن‘ کو بتایا کہ یہ معاہدہ ان کے موجودہ حکومتی معاہدے میں ایک ترمیم ہے۔
واضح رہے کہ امریکی محکمۂ دفاع نے حال ہی میں بعض AI کمپنیوں پر دباؤ بڑھایا ہے کہ وہ اپنی ٹیکنالوجی کو خفیہ نیٹ ورکس پر بغیر اضافی پابندیوں کے دستیاب کریں تاکہ دفاعی استعمال میں تیزی لائی جا سکے۔
