اسپیکر پنجاب اسمبلی ملک محمد احمد خان نے پبلک پیٹیشن کے لیے اسکروٹنی کمیٹی قائم کر دی جس کا باقاعدہ نوٹیفکیشن اسمبلی سیکریٹریٹ کی جانب سے جاری کر دیا گیا ہے۔
یہ بھی پڑھیں: محفوظ جنگلات میں کان کنی کی اجازت، پنجاب اسمبلی نے اہم قانون منظور کر لیا
نوٹیفکیشن کے مطابق اب عام شہری بھی پنجاب اسمبلی میں پبلک پیٹیشن دائر کر سکیں گے۔ پیٹیشن جمع کروانے کے لیے کم از کم 200 افراد کے دستخط لازمی ہوں گے۔
اعلامیے میں کہا گیا ہے کہ اہم نوعیت کے عوامی مسائل سے متعلق پیٹیشن پنجاب اسمبلی میں پیش کی جا سکیں گی جن کا جائزہ اسکروٹنی کمیٹی لے گی اور سفارشات مرتب کرے گی۔
مزید پڑھیے: 18 سال سے کم عمر بچوں کی شادی پر سزا، پنجاب اسمبلی کے رکن نے عدالت سے اجازت کا مطالبہ کیوں کیا؟
اسکروٹنی کمیٹی کی سربراہی ڈپٹی سپیکر کریں گے، بکہ کمیٹی کو پابند کیا گیا ہے کہ وہ 30 دن کے اندر اندر موصول ہونے والی پبلک پیٹیشنز پر اپنی سفارشات تیار کرے۔
نوٹیفکیشن کے مطابق پبلک پیٹیشن کا فارم پنجاب اسمبلی کی آفیشل ویب سائٹ سے حاصل کیا جا سکے گا۔ اسکروٹنی کمیٹی اپنی سفارشات سپیکر پنجاب اسمبلی کو پیش کرے گی۔
اسمبلی سیکرٹریٹ نے اس حوالے سے باقاعدہ نوٹیفکیشن جاری کر دیا ہے جس کے بعد عوام کو قانون سازی کے عمل میں براہ راست شرکت کا موقع ملے گا۔
