سعودی عرب نے 15 سال سے کم عمر افراد پر حج کی ادائیگی سے متعلق عائد پابندی ختم کر دی ہے۔
پاکستان ایئرپورٹ اتھارٹی (پی اے اے) نے اس فیصلے کی تصدیق کرتے ہوئے بتایا ہے کہ سعودی حکومت نے حج کے لیے عمر کی 15 سالہ شرط واپس لے لی ہے۔
تفصیلات کے مطابق اب 12 سال یا اس سے زائد عمر کے بچوں کو دوبارہ حج کی اجازت دے دی گئی ہے، جبکہ 15 سال سے کم عمر عازمین پر عائد پابندی بھی ختم کر دی گئی ہے۔
پی اے اے کے مطابق سابقہ پالیسی بحال ہو گئی ہے جس کے تحت 12 سال یا اس سے زائد عمر کے افراد حج کے اہل تصور کیے جائیں گے، جبکہ وہ ویزے جو عمر کی پابندی کے باعث مسترد کیے گئے تھے انہیں دوبارہ پراسیس کیا جائے گا۔
واضح رہے کہ اس سے قبل یہ خبر سامنے آئی تھی کہ سعودی عرب نے حج پالیسی میں ایک اہم تبدیلی کرتے ہوئے 15 سال سے کم عمر بچوں کے لیے حج کی ادائیگی پر پابندی عائد کر دی ہے، جس کا اطلاق فوری طور پر کیا جا رہا ہے۔
