آن لائن رپورٹس کے مطابق کیمبرج انٹرنیشنل کے اے لیول بزنس اسٹڈیز کا پرچہ لیک ہو گیا ہے، جس سے جاری مئی–جون امتحانی سلسلے کی شفافیت پر نئے سوالات اٹھ گئے ہیں۔
سوشل میڈیا پلیٹ فارمز پر شیئر کی جانے والی پوسٹس اور مباحث کے مطابق مبینہ بزنس پرچہ مقررہ امتحان سے قبل ہی آن لائن دستیاب تھا۔
ان دعوؤں میں کہا گیا ہے کہ سوالات اور متعلقہ مواد طلبہ کے درمیان گردش کر رہے تھے، تاہم ان رپورٹس کی آزادانہ طور پر تصدیق نہیں ہو سکی ہے۔
یہ بھی پڑھیں: اے لیول کا پرچہ لیک ہوا، کیمبرج کی تصدیق
یہ تازہ الزامات اس وقت سامنے آئے ہیں جب چند روز قبل کیمبرج انٹرنیشنل ایجوکیشن نے تصدیق کی تھی کہ جون 2026 سیشن کے اے ایس لیول میتھمیٹکس کا ایک پرچہ پاکستان سمیت متعدد خطوں میں ضابطوں کی خلاف ورزی کرتے ہوئے قبل از وقت شیئر کیا گیا تھا۔
اس سے پہلے ہونے والی اس خلاف ورزی پر امتحانی بورڈ نے تحقیقات شروع کی تھیں، کیونکہ رپورٹس کے مطابق میتھمیٹکس کا پرچہ امتحان سے کئی گھنٹے پہلے آن لائن آ گیا تھا، جس پر طلبہ اور والدین کی جانب سے امتحان کی شفافیت اور سیکیورٹی کے حوالے سے شکایات سامنے آئی تھیں۔
مزید پڑھیں:اے لیول کے پرچے لیک ہونے کے اعتراف کے باوجود کیمرج کا دوبارہ امتحان نہ لینے کا فیصلہ
حکام نے یہ بھی تسلیم کیا تھا کہ جاری امتحانی دور کے دوران پیپر لیک کی رپورٹس سے وہ آگاہ ہیں اور اس طرح کے واقعات کی مکمل تحقیقات کی جاتی ہیں، جبکہ عام طور پر امتحانی سلسلہ مکمل ہونے کے بعد مزید اپ ڈیٹس فراہم کی جاتی ہیں۔
اس نوعیت کے الزامات کے بار بار سامنے آنے سے امتحانی سیکیورٹی کے نظام پر نگرانی مزید سخت ہو گئی ہے، خاص طور پر اس تناظر میں کہ گزشتہ برسوں میں بھی پاکستان میں متعدد اے لیول پرچوں کے جزوی لیک ہونے کے واقعات رپورٹ ہوئے تھے۔
مزید پڑھیں: ایم ڈی کیٹ کا پرچہ پونے 14 گھنٹے پہلے آؤٹ ہوا، عدالت کا تفصیلی فیصلہ جاری
اب تک کیمبرج انٹرنیشنل ایجوکیشن کی جانب سے اے لیول بزنس کے مبینہ لیک کے حوالے سے کوئی باضابطہ بیان جاری نہیں کیا گیا۔
تصدیق نہ ہونے کے باعث اس مبینہ خلاف ورزی کے حجم، حقیقت اور ممکنہ اثرات کے بارے میں غیر یقینی صورتحال برقرار ہے۔
اس پیش رفت نے طلبہ اور اساتذہ میں تشویش کو دوبارہ بڑھا دیا ہے، کیونکہ امتحانات کے نتائج یونیورسٹی داخلوں میں اہم کردار ادا کرتے ہیں اور کسی بھی بے ضابطگی کو موجودہ سیشن کے امیدواروں کے لیے ایک سنجیدہ مسئلہ سمجھا جاتا ہے۔
