وزیراعظم پاکستان شہباز شریف نے کہا ہے کہ انہیں یقین ہے کہ فیلڈ مارشل سید عاصم منیر کی کوششیں خطے میں دیرپا امن کے قیام میں اہم کردار ادا کریں گی، اور امن کے ذریعے خوشحالی کو فروغ ملے گا جبکہ بے روزگاری میں بھی کمی آئے گی۔
اسلام آباد میں پاکستان علما کونسل کے زیرِ اہتمام منعقدہ چھٹی بین الاقوامی پیغامِ اسلام کانفرنس سے خطاب کرتے ہوئے وزیراعظم کا کہنا تھا کہ اسلام سراسر امن کا درس دیتا ہے اور درپیش مسائل کا حل تلاش کیا جائے گا۔
مزید پڑھیں: جنگ کے خاتمے کے لیے وزیراعظم پاکستان اور فیلڈ مارشل کے کردار کو سراہتے ہیں، ایرانی سفیر
انہوں نے ایران اور امریکا کی قیادت کا شکریہ ادا کرتے ہوئے کہا کہ دونوں ممالک کے رہنما پاکستان کی دعوت پر اسلام آباد آئے۔
انہوں نے کہاکہ حالیہ بحران کے دوران قوم نے مسلکی اور فرقہ وارانہ اختلافات سے بالاتر ہو کر اتحاد کا مظاہرہ کیا اور سیسہ پلائی دیوار بن گئی، یہ طرزِ عمل آئندہ بھی برقرار رکھا جائے گا۔
وزیرِاعظم نے علمائے کرام پر زور دیا کہ وہ اس موقع سے فائدہ اٹھاتے ہوئے امت میں اتفاق اور ہم آہنگی کو فروغ دیں۔
شہباز شریف کا مزید کہنا تھا کہ جس طرح قیامِ پاکستان کے وقت قوم متحد تھی، اسی جذبے کے ساتھ خطے میں امن کے لیے بھی یکسو ہے، اور پاکستان اپنا مثبت کردار جاری رکھے گا۔
انہوں نے علمائے کرام کو اتحادِ امت کے فروغ میں فعال کردار ادا کرنے کی تلقین کی۔
وزیراعظم نے کہاکہ حرمین شریفین کا دفاع پاکستانیوں کے لیے انتہائی اہمیت کا حامل ہے، اور سعودی عرب کے ساتھ دفاعی تعاون اسی عزم کا اظہار ہے۔ انہوں نے واضح کیا کہ امت میں تفرقہ پھیلانے والے اور دہشت گردی میں ملوث عناصر اسلام کی نمائندگی نہیں کرتے۔
انہوں نے فلسطین اور کشمیر کے حوالے سے پاکستان کے مؤقف کا اعادہ کرتے ہوئے کہا کہ جب تک کشمیریوں کو ان کا حقِ خودارادیت نہیں مل جاتا، پاکستان ان کی سیاسی و اخلاقی حمایت جاری رکھے گا۔
انہوں نے کہاکہ پشاور سے کراچی تک پوری قوم متحد ہے اور پیغمبرِ اسلام ﷺ کی حیاتِ مبارکہ مسلمانوں کے لیے رہنمائی کا سرچشمہ ہے۔
