پاکستانی حج مشن کے ’گم شدہ اشیا مرکز‘ نے ایمانداری اور ذمہ داری کی مثال قائم کرتے ہوئے جدہ ہوائی اڈے پر گم ہونے والی 4308 سعودی ریال رقم ایک پاکستانی عازمِ حج کو واپس لوٹا دی۔
مزید پڑھیں:سعودی عرب میں عازمین حج کے لیے ڈیجیٹل سہولتوں میں اضافہ
مکہ مکرمہ میں مرکز کے شفٹ نگران رانا مجاہد کے مطابق لاہور سے تعلق رکھنے والے عازمِ حج عثمان شاہد سعودی فضائی پرواز کے ذریعے جدہ پہنچے تھے جہاں ان کی احرام والی بیلٹ گم ہو گئی۔ اس بیلٹ میں 4308 سعودی ریال موجود تھے جن کی مالیت پاکستانی کرنسی میں قریباً سوا 3 لاکھ روپے بنتی ہے۔
انہوں نے بتایا کہ جدہ ہوائی اڈے پر تعینات پاکستانی حج مشن کے ٹیم نگران حیدر علی کو یہ بیلٹ ملی، تاہم اس میں کوئی شناختی دستاویز موجود نہیں تھی۔ امانت کو محفوظ طریقے سے مکہ مکرمہ منتقل کر دیا گیا۔
دوسری جانب عثمان شاہد نے مکہ پہنچ کر اپنی گم شدہ بیلٹ کی اطلاع درج کروائی۔ بعد ازاں دی گئی نشانیوں، رقم کی درست تفصیلات اور دیگر معلومات کی مکمل جانچ کے بعد رقم اور بیلٹ ان کے حوالے کر دی گئی۔
رقم واپس ملنے پر عازمِ حج عثمان شاہد نے خوشی کا اظہار کرتے ہوئے پاکستانی حج مشن، حکومتِ پاکستان اور سعودی حکام کا شکریہ ادا کیا۔ ان کا کہنا تھا کہ رقم گم ہونے پر وہ شدید پریشان تھے، تاہم متعلقہ عملے نے بھرپور تعاون کیا۔
مزید پڑھیں:پاکستانی عازمینِ حج مسجد الحرام میں نماز جمعہ کی تیاریوں میں مصروف
رانا مجاہد نے کہا کہ پاکستانی حج مشن عازمینِ حج کی خدمت اور ان کے مسائل کے فوری حل کے لیے سرگرم ہے۔ انہوں نے عازمین کو ہدایت کی کہ وہ اپنی قیمتی اشیا کی حفاظت کریں اور کسی بھی گمشدگی کی صورت میں فوری طور پر گم شدہ اشیا مرکز سے رابطہ کریں۔
