بالی ووڈ کی معروف اداکارہ کیارا ایڈوانی نے حال ہی میں ایک پوڈکاسٹ میں اپنی بعد از زچگی (پوسٹ پارٹم) کی مشکلات اور اس دوران اپنے شوہر سدھارتھ ملہوترا کی جانب سے ملنے والی جذباتی حمایت کے بارے میں تفصیل سے بات کی ہے۔
کیارا اڈوانی نے بتایا کہ ان کی بیٹی سرایاہ کی پیدائش 15 جولائی 2025 کو ہوئی، اور اس کے بعد کا وقت ان کے لیے جذباتی طور پر کافی مشکل رہا۔ ان کے مطابق اس دوران ان کے جذبات انتہائی غیر مستحکم تھے اور معمولی باتیں بھی انہیں رلا دیتی تھیں۔
یہ بھی پڑھیں: بھارتی اداکارہ کیارا ایڈوانی اور سدھارتھ ملہوترا کے گھر بیٹی کی پیدائش
پوڈکاسٹ میں گفتگو کرتے ہوئے انہوں نے کہا کہ اس عرصے میں ان کے شوہر اپنی فلم کی تشہیری مصروفیات کے باوجود رات دیر سے گھر آتے تھےلیکن پھر بھی بچے اور ان کے ساتھ وقت گزارتے اور صبح دوبارہ کام پر چلے جاتے تھے۔
کیارا کے مطابق اس دوران ہر چھوٹی بات انہیں جذباتی طور پر متاثر کرتی تھی۔ انہوں نے بتایا کہ ڈاکٹر نے مشورہ دیا تھا کہ انہیں روزانہ رات کے وقت ڈرائیو پر لے جایا جائے تاکہ وہ تازہ ہوا لے سکیں اور گھر کے معمولات سے کچھ دیر کے لیے باہر آ سکیں۔ کیارا کے مطابق سدھارتھ انہیں روزانہ رات کو گاڑی میں گھمانے لے جاتے تھے جو ان کے لیے ذہنی سکون کا باعث بنتا تھا۔
یہ بھی پڑھیں: شہناز گل نے کیا واقعی سدھارتھ کی موت سے فائدہ اٹھایا؟
اداکارہ نے مزید کہا کہ اس دوران انہیں کبھی کبھار صرف اپنے دل کی باتیں کرنے کی ضرورت ہوتی تھی۔ ان کے مطابق یہ وقت ان کی زندگی میں جذباتی طور پر ایک اہم تبدیلی کا مرحلہ تھا۔
واضح رہے کہ کیارا اڈوانی نے بیٹی کی پیدائش کے صرف پانچ ماہ بعد دوبارہ کام شروع کر دیا تھا۔ انہوں نے یہ بھی انکشاف کیا کہ حمل کے دوران انہوں نے فلم Toxic پر تقریباً سات ماہ تک کام کیا، جس میں انہوں نے ایکشن مناظر بھی شوٹ کیے۔
