وفاقی وزیر پیٹرولیم علی پرویز ملک نے ریفائنری سیکٹر کے سربراہان سے اہم ملاقات کی جس میں براؤن فیلڈ ریفائنری اپ گریڈیشن پالیسی پر عملدرآمد تیز کرنے پر اتفاق کیا گیا۔
اعلامیے کے مطابق وفاقی وزیر نے ریفائنری سیکٹر کو مکمل حکومتی معاونت کی یقین دہانی کراتے ہوئے کہاکہ اس شعبے کی ترقی کے لیے تمام ضروری اقدامات کیے جائیں گے۔
انہوں نے ریفائنری پالیسی پر پیشرفت میں تاخیر پر تشویش کا اظہار کرتے ہوئے کہاکہ ریفائنریوں کی جدید کاری اور طویل المدتی سرمایہ کاری کے لیے درپیش رکاوٹوں کا خاتمہ ناگزیر ہے۔
اجلاس میں اپ گریڈیشن منصوبوں کے دوران پیٹرولیم مصنوعات پر سیلز ٹیکس استثنیٰ کے مسئلے پر بھی تفصیلی غور کیا گیا، جبکہ ریفائننگ پالیسیوں اور اپ گریڈیشن معاہدے کے ماڈل کا جائزہ لیا گیا۔
ریفائنری سربراہان نے اجلاس کے دوران عملی تجاویز پیش کیں۔ وفاقی وزیر نے ہدایت کی کہ آئندہ بجٹ کی تیاری سے قبل تمام مسائل کے حل کے لیے جامع سفارشات متعلقہ فورمز کو بھجوائی جائیں۔
علی پرویز ملک نے کہاکہ حکومت ریفائنری اپ گریڈیشن کی مکمل حمایت کرے گی کیونکہ یہ شعبہ توانائی تحفظ کے لیے کلیدی قومی اثاثہ ہے۔
انہوں نے کہا کہ عالمی صورتحال، خصوصاً امریکا اور ایران کے تنازع کے تناظر میں بیرونی سپلائی پر انحصار کم کرنا ضروری ہوگیا ہے۔
وفاقی وزیر کے مطابق ریفائنری اپ گریڈیشن سے نہ صرف پیداواری صلاحیت اور کارکردگی میں بہتری آئے گی بلکہ یورو فائیو معیار کا صاف ایندھن بھی تیار کیا جا سکے گا، جس سے آلودگی میں کمی اور ماحولیاتی بہتری ممکن ہوگی۔
انہوں نے کہاکہ جدید معیار کے ایندھن سے انجن کی کارکردگی بہتر ہوگی اور اخراج میں نمایاں کمی آئے گی، جو مجموعی طور پر توانائی شعبے کی بہتری میں اہم کردار ادا کرے گا۔
