وزیراعظم محمد شہباز شریف کی زیر صدارت رواں مالی سال کے ترقیاتی بجٹ اور آئندہ مالی سال کے پبلک سیکٹر ڈویلپمنٹ پروگرام (پی ایس ڈی پی) سے متعلق اہم جائزہ اجلاس اسلام آباد میں منعقد ہوا، جس میں قومی ترقیاتی منصوبوں اور فنڈز کی ترجیحات پر غور کیا گیا۔
مزید پڑھیں: وزیراعظم محمد شہباز شریف کا سمندر پار پاکستانیوں سے اظہارِ تشکر، اکتوبر میں ترسیلاتِ زر 3.4 ارب ڈالر سے زائد
اجلاس سے خطاب کرتے ہوئے وزیراعظم نے کہا کہ بہتر کارکردگی دکھانے والی وزارتوں کو ترقیاتی منصوبوں کے لیے ترجیحی بنیادوں پر بجٹ فراہم کیا جائے گا، جبکہ عوام کا پیسہ صرف ایسے منصوبوں پر خرچ کیا جائے گا جن کے نتائج یقینی ہوں۔
وزیرِ اعظم محمد شہباز شریف کی زیر صدارت رواں برس کے ترقیاتی بجٹ اور آئندہ مالی سال کے لئے ترقیاتی بجٹ (PSDP) کے منصوبوں پر جائزہ اجلاس آج اسلام آباد میں منعقد ہوا.
بہتر کارکردگی والی وزارتوں کو ترقیاتی منصوبوں کیلئے ترجیحی بنیادوں پر بجٹ فراہم کیا جائے گا. وزیرِ اعظم@KulAalam pic.twitter.com/fD1zkbpv12— Media Talk (@mediatalk922) May 18, 2026
وزیراعظم نے واضح کیا کہ پانی کے ذخائر اور پن بجلی کے منصوبے حکومت کی اولین ترجیحات میں شامل ہیں، اسی لیے داسو، دیامر بھاشا اور مہمند ڈیم جیسے اہم منصوبوں پر خصوصی توجہ دی جا رہی ہے۔ اجلاس کو ان منصوبوں پر پیشرفت سے بھی آگاہ کیا گیا۔
اجلاس میں وزیراعظم نے پانڈا بانڈز کے کامیاب اجرا اور عالمی مارکیٹ میں ان کی پذیرائی پر وزیر خزانہ کی تعریف کی، جبکہ ریلوے، آئی ٹی اور پاور ڈویژن کی کارکردگی کو بھی سراہا گیا۔
مزید پڑھیں: بھارت کو فاش غلطی کا خمیازہ ضرور بھگتنا ہوگا، وزیراعظم محمد شہباز شریف کا قوم سے خطاب
وزیراعظم نے ہدایت کی کہ ترقیاتی منصوبوں میں پبلک پرائیویٹ پارٹنرشپ کی زیادہ سے زیادہ حوصلہ افزائی کی جائے تاکہ قومی وسائل کا مؤثر استعمال یقینی بنایا جا سکے۔
اجلاس میں نائب وزیراعظم و وزیر خارجہ اسحاق ڈار، وفاقی وزراء احسن اقبال، احد خان چیمہ، محمد اورنگزیب، رانا تنویر حسین، شزہ فاطمہ خواجہ، حنیف عباسی، اویس لغاری، عبدالعلیم خان، ڈاکٹر خالد مقبول صدیقی، وزیر مملکت بلال اظہر کیانی، معاون خصوصی ہارون اختر اور دیگر اعلیٰ حکام نے شرکت کی۔
