گوگل نے اپنی سالانہ کانفرنس ’گوگل آئی او‘ میں اپنے سرچ انجن کو مصنوعی ذہانت (اے آئی) کے ساتھ مکمل طور پر تبدیل کرنے اور نئی اسمارٹ گلاسز متعارف کروانے کا اعلان کیا ہے۔
یہ بھی پڑھیں: گوگل آئی او کانفرنس کا آغاز، اے آئی اپ ڈیٹس سے لے کر اسمارٹ گلاسز تک کیا کچھ متعارف کروایا جاسکتا ہے؟
کمپنی اب ایسے آرٹیفیشل انٹیلیجنس ایجنٹس پر توجہ مرکوز کررہی ہے جو صارفین کے روزمرہ کے پیچیدہ کاموں کو پسِ منظر میں خودکار طریقے سے سنبھال سکیں گے۔ چیف ایگزیکٹو سندر پچائی کا کہنا ہے کہ وہ ان جدید ایجنٹس کی طاقت عام صارفین تک پہنچانے کے لیے پوری طرح تیار ہیں تاکہ یہ ہر فرد کے لیے کارآمد بن سکیں۔
اس بڑی تبدیلی کے تحت گوگل سرچ باکس کو نئے ’جیمنائی 3.5 فلیش‘ ماڈل کے ساتھ اپ گریڈ کر دیا گیا ہے۔ گوگل کی سرچ ہیڈ لز ریڈ کے مطابق یہ نیا سسٹم صارف کے لیے پسِ منظر میں انٹرنیٹ پر خریداری، تحقیق اور اپائنٹمنٹس بک کرنے کی صلاحیت رکھتا ہے۔ یہ اپ گریڈ سرچ انجن کی روایتی خصوصیات اور آرٹیفیشل انٹیلیجنس کا بہترین امتزاج ثابت ہوگا۔
ٹیکنالوجی کمپنی نے اسمارٹ گلاسز متعارف کروا کر پہننے کے قابل گیجٹس کی دنیا میں بھی دوبارہ قدم رکھ دیا ہے۔ یہ آواز سے کنٹرول ہونے والی آڈیو گلاسز اینڈرائیڈ ایکس آر ٹیکنالوجی پر بنائی گئی ہیں جن کے لیے واربی پارکر جیسے برانڈز سے شراکت داری کی گئی ہے۔
یہ بھی پڑھیں: مصنوعی ذہانت سے لیس ’گوگل بک‘ متعارف، قیمت کیا ہے؟
رواں سال خزاں کے موسم میں لانچ ہونے والی یہ عینک براہِ راست جیمنائی سے منسلک ہوگی جس سے صارفین ہاتھوں کے استعمال کے بغیر مدد حاصل کرسکیں گے۔
