کنگ آف پاپ اور عالمی شہرت یافتہ گلوکار، گیت نگار اور رقاص آنجہانی مائیکل جیکسن کا 43 سال پرانا شہرۂ آفاق گانا Billie Jean ایک بار پھر دنیا بھر میں مقبولیت کے نئے ریکارڈ قائم کرنے لگا۔ حیران کن طور پر یہ کلاسک ٹریک بل بورڈ گلوبل 200 چارٹ پر نمبر ون بن گیا ہے جس نے جسٹن بیبر، بی ٹی ایس اوت ٹیلر سوفٹ جیسے سپر اسٹارز کے گانوں کو بھی پیچھے چھوڑ دیا۔
رپورٹس کے مطابق Billie Jean کی مقبولیت میں اچانک اضافے کی بڑی وجہ مائیکل جیکسن کی نئی بائیوپک مائیکل کی ریلیز بنی، جس نے دنیا بھر میں شاندار کامیابی حاصل کی۔ فلم کے ٹریلرز اور پروموشنل مواد میں اس گانے کو نمایاں طور پر استعمال کیا گیا، جس کے بعد نئی نسل نے بھی اسے بڑے پیمانے پر اسٹریمنگ پلیٹ فارمز پر سننا شروع کردیا۔
یہ بھی پڑھیں: مائیکل جیکسن کی زندگی پر بنی فلم ریلیز، شاندار موسیقی مگر ادھوری کہانی
بل بورڈ گلوبل 200 چارٹ، جو دنیا بھر میں اسٹریمنگ اور ڈیجیٹل مقبولیت کی بنیاد پر تیار کیا جاتا ہے، میں Billie Jean گزشتہ 144 ہفتوں سے موجود تھا، تاہم پہلی بار یہ نمبر ون پوزیشن تک پہنچا ہے۔
یہ گانا Thriller کا حصہ تھا، جسے موسیقی کی تاریخ کا سب سے زیادہ فروخت ہونے والا البم قرار دیا جاتا ہے۔ Billie Jean کی دنیا بھر میں 18 ملین سے زائد کاپیاں فروخت ہوچکی ہیں، جبکہ یہ امریکا، برطانیہ، آسٹریلیا، فرانس اور کینیڈا سمیت کئی ممالک میں ریلیز کے وقت نمبر ون رہا تھا۔
یہ بھی پڑھیں: مائیکل جیکسن کی زندگی پر بنی فلم ریلیز، شاندار موسیقی مگر ادھوری کہانی
تازہ رینکنگ میں Beauty and a Beat دوسرے نمبر پر چلا گیا، جبکہ Swim کو بھی پیچھے چھوڑ دیا گیا۔ دوسری جانب ٹیلر سوفٹ کا کوئی بھی گانا اس وقت ٹاپ 10 میں شامل نہیں۔
مائیکل جیکسن کی بائیوپک کی کامیابی کے بعد ان کے دیگر مشہور گانے بھی دوبارہ عالمی میوزک چارٹس میں نمایاں پوزیشنز حاصل کر رہے ہیں، جن میں Beat It، Human Nature اور Smooth Criminal شامل ہیں۔
