پنجاب کی سینیئر وزیر مریم اورنگزیب نے جمعرات کو بتایا کہ وزیراعلیٰ پنجاب مریم نواز کی لاہور کے شریف میڈیکل سٹی اسپتال میں بڑی اہم سرجری کی گئی ہے۔
سماجی رابطے کی ویب سائٹ ایکس پر جاری اپنے بیان میں مریم اورنگزیب نے کہا کہ وزیراعلیٰ مریم نواز ایک بڑے آپریشن کے بعد اسپتال سے گھر منتقل ہوگئی ہیں۔
یہ بھی پڑھیں: دفتر چھوڑیں اور فیلڈ میں آئیں، وزیرِ اعلیٰ مریم نواز کا عید الاضحیٰ پر افسران کو فرنٹ لائن پر رہنے کا سخت حکم
انہوں نے بتایا کہ اسپتال میں موجود ہونے کے باوجود وزیراعلیٰ پنجاب نے عید کے پہلے روز صوبے میں سیکیورٹی، صفائی ستھرائی اور دیگر انتظامی امور کی نگرانی جاری رکھی۔
مریم اورنگزیب کی پوسٹ پر ردعمل دیتے ہوئے وفاقی وزیر برائے انفارمیشن ٹیکنالوجی شزا فاطمہ خواجہ نے مریم نواز کی صحت اور جلد صحتیابی کے لیے دعا کی۔
وزیراعلی مریم نواز شریف صاحبہ کی شریف میڈیکل سٹی ہسپتال میں میجر سرجری ہوئی ہے جس کے بعد وہ گھر منتقل ہو گئی ہیں، الحمدللہ۔ عید کے دن وزیر اعلی مریم نواز شریف نے ہسپتال سے صوبے میں سکیورٹی، صفائی سمیت دیگر تمام امور کی براہ راست خود نگرانی کی۔
— Marriyum Aurangzeb (@Marriyum_A) May 28, 2026
واضح رہے کہ نومبر 2024 میں بھی وزیراعلیٰ پنجاب مریم نواز کو طبیعت ناساز ہونے پر شریف میڈیکل سٹی اسپتال میں داخل کیا گیا تھا۔
اس وقت مریم اورنگزیب نے بتایا تھا کہ ان کے تھائرائیڈ کے ٹیسٹ کیے گئے تھے۔
مزید پڑھیں: اداکارہ کو ہراساں کرنے کا معاملہ، وزیرِ اعلیٰ مریم نواز کا قانون کے مطابق سخت کارروائی کا اعلان
گزشتہ ماہ صوبائی وزیر اطلاعات عظمیٰ بخاری نے مریم نواز کے کینسر میں مبتلا ہونے سے متعلق خبروں کو مسترد کرتے ہوئے انہیں مکمل طور پر جھوٹی خبر قرار دیا تھا۔
عظمیٰ بخاری کا کہنا تھا کہ کسی کی زندگی سے متعلق اس قسم کا جھوٹا پروپیگنڈا قابل مذمت ہے۔
بعد ازاں وہ صحافی بھی سامنے آئے جن سے یہ دعوے منسوب کیے گئے تھے، اور انہوں نے واضح کیا کہ انہوں نے مریم نواز کی صحت کے بارے میں ایسا کوئی بیان نہیں دیا۔
