پاکستان کے نائب وزیراعظم اور وزیر خارجہ محمد اسحاق ڈار سے امریکی وزیر خارجہ مارکو روبیو نے جمعے کو واشنگٹن میں ملاقات کی جس میں انہوں نے خطے اور عالمی سطح پر امن و استحکام کے فروغ کے لیے پاکستان کی مخلصانہ سفارتی اور ثالثی کوششوں کو تسلیم کرتے ہوئے خراج تحسین پیش کیا۔
یہ بھی پڑھیں: اسحاق ڈار کی نیویارک میں چینی وزیر خارجہ سے اہم ملاقات
دفتر خارجہ کی جانب سے جاری بیان کے مطابق دونوں رہنماؤں نے پاکستان اور امریکا کے درمیان دوطرفہ تعلقات میں مثبت پیشرفت پر اطمینان کا اظہار کیا اور بدلتی ہوئی علاقائی و عالمی صورتحال پر تبادلہ خیال کیا۔
بیان کے مطابق مارکو روبیو نے علاقائی امن کے قیام کے لیے پاکستان کی سفارتی کاوشوں کو سراہتے ہوئے کہا کہ دونوں ممالک کو باہمی دلچسپی کے شعبوں میں تعاون مزید مضبوط بنانے کی ضرورت ہے۔
اس موقعے پر تجارت و سرمایہ کاری، سیکیورٹی اور انسداد دہشتگردی سمیت مختلف شعبوں میں تعاون بڑھانے پر اتفاق کیا گیا۔
The Deputy Prime Minister/Foreign Minister, Senator Mohammad Ishaq Dar @MIshaqDar50 held a bilateral meeting today with the U.S. Secretary of State, Marco Rubio @SecRubio in Washington D.C.
The two leaders expressed satisfaction over the positive momentum in the Pak-U.S.… pic.twitter.com/s3n4bCeQjh
— Ministry of Foreign Affairs – Pakistan (@ForeignOfficePk) May 29, 2026
دونوں رہنماؤں نے اس عزم کا اظہار کیا کہ اعلیٰ سطحی روابط کے ذریعے پاکستان اور امریکا کے شراکتی تعلقات کو مزید وسعت دی جائے گی، جس کا مقصد خطے میں امن، استحکام اور خوشحالی کو فروغ دینا ہے۔
یہ ملاقات ایسے وقت میں ہوئی ہے جب پاکستان فریقین یعنی امریکا، ایران اور اسرائیل کے درمیان کشیدگی کم کرنے اور ایک پائیدار امن معاہدے کی کوششوں میں سرگرم کردار ادا کر رہا ہے اور اب تک مستقل مزاجی، خلوص اور انتھک محنت کا مظاہرہ کرتا آیا ہے جس کے اب ثمرات بھی نمایاں ہوچکے ہیں۔
مزید پڑھیں: پاکستانی سفارتکاری رنگ لے آئی، اسحاق ڈار نے اہم پیشرفت کی تصدیق کر دی
امریکی صدر ڈونلڈ ٹرمپ بھی عندیہ دے چکے ہیں کہ ایران کے جوہری پروگرام اور آبنائے ہرمز کی بحالی سے متعلق واشنگٹن اور تہران کے درمیان پیشرفت ہو رہی ہے۔
امریکا اور پاکستان کی سلامتی و خوشحالی کے لیے مل کر کام کرنا ضروری ہے، روبیو
دریں اثنا امریکی وزیرخارجہ مارکو روبیو نے بھی نئے اپنے ایکس اکاؤنٹ پر ایک پیغام شیئرکیا جس میں انہوں نے اپنے پاکستانی ہم منصب اسحاق ڈار سے ملاقات کا تذکرہ کیا۔
Met with Pakistani Deputy Prime Minister and Foreign Minister @MIshaqDar50 and thanked him for the role Pakistan continues to play in advancing peace in the Middle East. We agreed upon the importance of working together to further strengthen a meaningful partnership for better… pic.twitter.com/AavTAxBvAd
— Secretary Marco Rubio (@SecRubio) May 29, 2026
مارکو روبیو نے کہا کہ میں نے پاکستان کے نائب وزیراعظم اور وزیر خارجہ محمد اسحاق ڈار سے ملاقات کی اور مشرق وسطیٰ میں امن کے فروغ کے لیے پاکستان کے مسلسل کردار پر ان کا شکریہ ادا کیا۔
انہوں نے کہا کہ ہم نے اس بات پر اتفاق کیا کہ پاکستان اور امریکا کی سلامتی کو بہتر بنانے اور مزید خوشحالی کے لیے ایک مضبوط اور بامعنی شراکت داری کو مزید مستحکم بنانے کے لیے مل کر کام کرنا انتہائی اہم ہے۔
یہ بھی پڑھیے: وزیرِاعظم محمد شہباز شریف سے امریکی وزیرِ خارجہ مارکو روبیو کی ملاقات میں کن امور پر گفتگو ہوئی؟
یاد رہے کہ پاکستان نے 8 اپریل کو تہران اور واشنگٹن کے درمیان جنگ بندی کرانے میں اہم کردار ادا کیا تھا جبکہ 11 اپریل کو اسلام آباد میں ہونے والے براہ راست مذاکرات نے دونوں ممالک کے درمیان مزید بات چیت کی راہ ہموار کی تھی۔
