محکمہ موسمیات کے مطابق ملک کے بیشتر علاقوں میں آج بھی موسم گرم اور خشک رہنے کا امکان ہے، جبکہ جنوبی بلوچستان شدید گرمی کی لپیٹ میں رہے گا۔ کئی علاقوں میں درجہ حرارت معمول سے زیادہ ریکارڈ ہونے کی توقع ہے۔
مزید پڑھیں: پاکستان بھر میں گرم اور خشک موسم کی لہر برقرار، محکمہ موسمیات کی وارننگ
محکمہ موسمیات کا کہنا ہے کہ جنوبی پنجاب، بالائی سندھ اور شمال مشرقی بلوچستان میں دوپہر کے بعد موسم تبدیل ہو سکتا ہے۔ رحیم یار خان، ڈیرہ غازی خان، دادو، لاڑکانہ، جیکب آباد، نصیر آباد، کوہلو، بارکھان اور موسیٰ خیل میں تیز ہواؤں، آندھی اور گرج چمک کے ساتھ بارش کا امکان ہے۔
وفاقی دارالحکومت اسلام آباد اور گردونواح میں موسم گرم رہے گا، تاہم مطلع جزوی طور پر ابر آلود رہنے کی توقع ہے۔ خیبرپختونخوا کے بیشتر اضلاع میں بھی گرمی برقرار رہے گی، البتہ کوہستان، بٹگرام اور وزیرستان کے بعض علاقوں میں رات کے وقت بارش متوقع ہے۔
مری، گلیات، کشمیر اور گلگت بلتستان میں مطلع جزوی ابر آلود رہے گا، جبکہ مری، گلیات اور کشمیر کے چند علاقوں میں رات گئے گرج چمک کے ساتھ بارش ہو سکتی ہے۔
مزید پڑھیں:تیز ہوائیں، ژالہ باری اور گرج چمک: محکمہ موسمیات نے پھر وارننگ دیدی
محکمہ موسمیات نے شہریوں کو شدید گرمی کے پیش نظر احتیاطی تدابیر اختیار کرنے، زیادہ پانی پینے اور غیر ضروری طور پر دھوپ میں نکلنے سے گریز کرنے کی ہدایت کی ہے۔
